Berîtan Canozer

 

ÊLIH - Feleknas Ucaya HDPyije dîyar kerde ke qayûman do Êlih ra bieşrawo coka bêsebir ê û va: "Yê şinê serê sindoqan ganî Leyla Guven, Edîp Solmaz û Egît xo vîr ra nêkerê. Ma do serê sindoqan de nîşanî serekomar bidê ke herra ma ça de ya. Ma do 31ê Adare de Kurdistan ça de yo nîşanê înan bidê."

 

Parlamentera HDPyî ya Êlihî Feleknas Uca atmosferê weçînayîşî ê bajarî şîrove kerde. Feleknase da zanayîş ke ê do rojê tarîxî ra derbaz benê û va çalakîya Leyla Guvene seba wedartişê tecrîdê Rayberê PKKî Abdullah Ocalan dabî destpêkerdiş roja 124an de yê. Feleknase heto bîn ra da zanayîş ke grev ameyê sewîyeya krîtîk û va hetêke weçînayîş, hetêke xoverdayîş û heto bîn zî amadekarîyê 8ê Adare û 21ê Adare yenê meşnayîş.

 

Feleknase arde ziwan ke hetê weçînayîş de Êlih cayêke stratejîk o wina va: "Êlih eynî wextî de bajarê Egîdan, bajarê Edîp Solmaz û bi hezaran xoverdayoxan o. Nika tornê înan xoverdayîş beyraqe înan dewr girewtê û têkoşîn kenê."

 

'Şar rayîr ney aştîye wazeno'

 

Feleknase arde ziwan ke hêrişî zêde bîyê û va hêrişkerdişê vera Heskîfî zî hêrişê kultur û tarîxîyê Şarê Kurdî kenê û hewl danê tarîx binê awe de bimano. Feleknase wina va: "Şarê Êlihî weçînayîşê sey referandum gênê dest. Şarê Êlihî hêrişan veng vejeno. Ma her ca de bi coşêke pîl yenê pêşwazîkerdiş. Şar rayîr ney, aştî û hizur wazeno. Sînemeya Yilmaz Guneyî ame rijnayene. Vera erjê şarî rêzdarî çin o. Sazgehê cinîyan ameyî padayîş, bi desan kesî ameyî îxrackerdiş. Şar înan ra nêrehet o. Hewl danê têmîyanê bikerê mîyanê şaran. Wazenê şarî HDPî ra dûr verdê."

 

'Do ê tîya ra şêrê'

 

Feleknase vatişê serekomarê AKPî Tayyîp Erdoganî ê ‘Wa heme HDPyijî şêrê Iraq’ ardî vîr û va: "Başur ê ma yo, Vakur ê ma yo. Şarê Êlihî do weçînayîşî de cewabê înan bido. Ma nêşinê cayêke. La ê do pey xo ra nêewnê û şêrê. Yê ke şinê serê sindoqan ganî Leyla Guven, Edîp Solmaz û Egît xo vîr ra nêkerê. Ma do serê sindoqan de nîşanê serekomar bidê ke herra ma ça de ya. Ma do 31ê Adare de nîşan bidê ke Kurdistan ça de yo."