ŞIRNEX - Husnîye Ecera ke 4 serrî yo cenazeya lajê xo Huseyîn Ecerî o ke qedexeyê tebervejîyayîşê kuçeyan de Hexez de cuya xo vindî kerd geyrena, pêwa ke nimûneyê gonî qetî bîyê zî hîna nêzanê cenaze ça de ya. Husnîyeye arde ziwan ke bi 4 serrî yo dosyayê ke mabêne Şirnex û Riha de şinê û yenê taqîb kenê.

 

Mabêne 2015-2016an de qedexeyê tebervejîyayîşê kuçeyan de bi desan kesî cuya xo vindî kerdibî, hîna xeylê kesî cenazeyê înan nêmaeyê vînayîş. Pêwa hende wext derbaz bîyo û keyeyan nimûneyê gonî dayî zî, cenazeyî bajaranê bînan de goristanê bêkesan de ameyê definkerdiş. Yew înan ra zî Huseyîn Ecero ke Hezex de cuya xo vindî kerdib. Dayîka ey Husnîye Ecere arde ziwan ke 4 serrî yo cenazeya lajê xo geyrena û va esteyêke lajê aye bo zî do pey cenazeyê ey de bo.

 

Dosya mabêne Riha û Şirnexî de şîyene û yena!

 

Husnîye arde ziwan ke wextê qedexeyî de pêrodayîşan de lajê aye Adara 2016an de cuya xo vindî kerd û va cenaze seba otopsî berdê Riha û reyke bîn zî ci ra zanayîş nêgirewtê. Husnîye da zanayîş ke bi lajê aye dir 4 cenazeyê bîn zî ameyê vetiş û dima ra Riha de ameyê tespîtkerdiş û  goristanê bêkesan de ameyê definkerdiş. Husnîye wina va: "Ma ewil Riha de dima ra Mêrdîn de nimûneyê gonî da. Keyeyan 4 serran cenazeyê xo geyrayî û dimayê nimûneyê gonî cenaze ameyî vînayîş. No bi qerarê bêtaqîbkerdişê Serdozgerîya Komara ya Şirnexî dayî vejîya meydan. Ma nê qerarî dir şî dozgerîya Hezexî."

 

Keyeyî serdayîşê sucî kerd

 

Dozgerîya Hezexî vana ke cenaze înan dir nîya û keye eşrawenê Şirnex. Dozgerîya Şirnexî na rey dosya eşrawenê Riha. Keye cewabê negatîf gêno û dosya newe ra resena dozgeriya Hezexî. Keye bi 4 serrî yo ke cenazeya xo nêvînenê û tewr peyîn keyeyî muracatê sucî kerd."

 

'Heta cenaze nêvînî do têkoşîn bikerî."

 

Husnîye Ecere arde ziwan ke cayê ke nêşîyê nêmendo û wina va: "Ma vernê de şî Şirnex înan ma eşrawit Riha. Bi 4 serrî yo ma têkoşîn kenê. Pêwa ke cenaze bellî bîya zî nêdanê ma. Gerek bidê. Vanê cenazeya şima esta la ma nêzanê ça de ya. Ma zî şî dewa akerd. Parçeyêke cenazeya ma menda zî ma do ci bigeyrê. Çend serrî şêro zî ma do her çî bikerê. Dewlete zulm ro ma kena. Ma do cenazeya lajê mi bivînê."