AMED - Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 121ine de dewam keno. Sewbîna çalakîyê grevê vêşanîye ke zindanan û cayanê cîya-cîyayan de seba eynî waştişan dest pêkerdbî zî bi qerardarî dewam kenî.

 

Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 121in de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena.

 

Girawe Îmralî de pêvînayîş 

 

12ê Çeleyî de çalakîya Leylaya ke grevê vêşanîye dewamkerdêne de birayê Abdullah Ocalan Mehmet Ocalan şi Îmralî û bi birayê xo dir pêvînayîş kerd. Leylaya ke o wext bi rayîrê avûkatanê xo dir derheqê babete de îzahat da û wina va: "Ceribnayîşê ma yê verê zî estê. Serra 2016an de koma ke ez zî tede ma 50 kesî vera tecrîdî teber de çalakîya grev dayî destpêkerdiş. AKPî o wext zî Mehmet Ocalanî seba bi Abdullah Ocalanî dir pêvînayîş bikero eşrawit Îmralî û bi mesajê ke birêz Ocalan ame çalakî amebî peynîkerdene. La tecrîd dewam keno. Nika zî eynî metod yeno kerdene. Birêz Ocalan rayberêke polîtîk o. Seba keyeyê xo girawe de nîyo. Sey hepsîyê bînan heqê ey ê pêvînayîşî esto.

 

Leyla Guven: Waştişê ma meşrû yê

 

Waştişê ma sere de zelal ê. Ma vanê tecrîd sucê merdimayî yo bêro wedartiş û birêz Ocalan bi avûkatan û keyeyê xo dir pêvînayîş bikero û bi heyetê xerîban dir bêro têhet. Coka ma çalakîya xo bi pêvînayîşêke bi peynî nêkenê. Waştişê ma vera qanûnî nîyê waştişê ma meşrû yê. Eke amancê AKP - MHPyî bedeldayîşê ma yo ma bedeldayîşî rê zî amade yê. Ma nê tifaqê faşîst ra vanê eke tabûtî zindanan ra vejîyê şima do nêeşkê cayê xo de binişnê ro."

 

Çalakîya hepsîyan dewam kena

 

Dimayê Leylaye Mintiqaya Federalê Kurdistanî çalakîya Temsîlkarê HDPyî Nasir Yagizî roj 108an de, Strasbourg de 14 kes û Gallerî de Îmam Şîş roja 82ine de yê. Hepsîyê ke 16ê Çele de çalakî dest pêkerdî roja 83yan de dewam kenê. Heto bîn ra çalakîya hepsîyê PKKyî û PAJKî ke 1 Adare de dest pêkerdî roja 8an de dewam kenê.

 

Tepiştiş de zî çalakî dewam de ya

 

Roja yewşeme parlamentera HDPyî ya Dêrsim Dag, endamê HDPî Salîh Cansever, Îsmet Yildiz, Sevîcan Yaşar, Salîh Tekîn û Bîlal Ozgezer zî awanîya HDPyî ya Amedî dest bi çalakîya grevê vêşanîye bêdem û bêagerayîş kerdî. Dimayê çalakî ame destpêkerdiş bi fermanê Wezîrê Karê Zerî Suleyman Soylu eştî serê awanî û 5 çalakger ameyî tepiş. Dêrsim dage awanîya HDPyî û 5 kesê ke ameyî tepiştiş zî çalakîya xo roja 7ine de dewam kenê.

 

Çarçewaya serdayîşê Leylaye dir yenê kerdene vizîr  Serekê Pêroyî yê Partîya Karkerê Tirkîya (TÎP) Erkan Baş, endamê MYKî Bariş Atay û îdarekarê partî şî serdayîşê Leylaye. Serekê Pêroyî yê TÎPî Erkan Başî ke dimayê serdayîşî qisey kerd wina va: "Çalakîya grevê vêşanîye ke zindana de ameyo destpêkerdiş û dewam keno, berpirsiyarîyêke pîl dano serê milê ma kesê ke teberê nê welatêke bîyo zindan cuyenê bar keno. Ma waşt ke ma Leyla, keyeyê aye û embazanê xo yê HDPyîjan ra vajê ke ma wazenê no warî de çi destê ma ra bêro ma do bikerê."