AMED - Cinyan bi sloganê "cinî seba azadîye sere wedarnenê, cinî grev de yê" beşdarê mitîngî bî. Cinîyan wareyê Îstasyonî de mesajê "Ganî heme kes biherikîyo cayê mitîngî û serewedaritişê Leyla Guvene û heme hepsîyê bîn ke zindana de yê bibê veng" dayî.

 

Cinîyan bi sloganê "Cinî seba azadîye sere wedarnena, cinî grev de yê" herikyayî wareyê Îstasyonî yê mîtingê 8ê Adare. Abluqayê polîsan ê wareyê mîtingî bale ant. Cinî bi cilanê xo yê Kurdî û bi erbaneyê xo kewtî wareyê mîtîngî. Polîsan pankartê "Wexto ke cinî azad bê, do dinya bilerzo", "Dest mede bedenê mi" nêgirewtî wareyê mîtîngî. Cinîyan pêwa heme astengîyan rayşîyayîşê xo kerdî. Saetê serê siba de cinîyê Mêrdîn, Dêrik, Nisêbîn, Qoser û Riha zî bi cilê xo yê Kurdî bale antî xo ser. Cinyan sloganê "Leyla rûmete ma ya", "Biciwîyo xoverdayîşê zindanan", "Cinî cu azadî", "seretewênayîş çin o, xoverdayîş esto" "Ma do cuya bê cinî serê şima de birijnê" berz kerdî û kewtî wareyê mîtingî.

 

'Ma do waştişê Leylaye biqîrê' 

 

Cinîyan dîyar kerdî ke waştişê înan waştişê Leyla Guvene yo û wina vatî: "Ma do waştişê Leyla biqîrê." Zeynep Karacaya ke seba beşdarbîyayîşê 8ê Adare Mêrdînî amî Amed û va: "Ma heme cinî seba piştdayîş bidê serewedartişê Leyla Guvene ma ameyî tîya. Wezîfeyê ma o yo ke ma bibê vengê nê serewedaritişî. Ma do  waştişê Leylaye biqîrê."

 

'Bêrê piştdayîş bidê  serewedaritişê tarîxî'

 

Cinîyan ra Hidayet Taşçi Mêrdînije zî wina va: "Ez 8ê Adare Leyla Guvene û hemrayîrê aye pîroz kenê. Ewro zindanan de şexsê Leyla de serewedaritişêke dest pêkerdo. Ma zî seba piştdayîş bidê nê serewedaritişû bibê vengê cinîyan ke ameyê qetilerdiş ma ameyî tîya. Ganî ewro heme cinî bêrê nê wareyî. Bêrê ma piştdayîş bidê na roje."

 

Behiye Kaya zî wina va: "Ez roja heme cinîyan pîroz kena. Ganî ma heme bibê vengê serewedaritişî. Ganî vera nê zulmî ma dest bidê destê yewbînan. Na dinya de seba ma hemine ca esta. Gerek hukmat nê rastîyan qebul bikero û fek nê zulmî ra vera bido. Wa Erdogan bêro îslamîyet dayîkê Kurdan ra bimuso. Ma şer nêwazenê. Domanê ma mîyanê çar dêsan de xo ver danê. Ma do ewro serewedaritişê Leylaye rê bibê veng. Biciwîyo xoverdayîşê Leyla Guvene."

 

Cinîyan bi sloganê "Leyla Guvene rûmete ma ya", "Biciwîyo xoverdyîşê Leyla Guvene","Biciwîyê xoverdayîşê zindanan" û bi tilîliyan kewtî wareyê mitîngî. Cinîyan wareyê mîtingê mesaj Leyla Guvene rê eşrawitî.