OSMANÎYE - Hemsereka Şaredarîya Pasûrî Sadiye Suer Barana ke qayûm tayînê herinda aye ame kerdene û nika Zindanê Padaye yê Tîpa Tyî yê Osmanîye de tewqîfkerdeya dîyar kerde ke roja destpêkerdişê çalakîya grevê vêşanîye ra nata hetê îdareyê zindanî ra raştê zextanê giranan yenî. 

 

Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene seba wedarnayîşê tecrîdê serê Rayberê PKKyî Abdullah Ocalanî 8ê Teşrîna Peyêne de Zindanê Amedî de dest bi çalakîya grevê vêşanîye yê bêdem û anêgêrayîşî kerde û çalakî ewro roja 118. de dewam kena. Badê Leylaye çalakîya grevê vêşanîye yê bêdem û anêgêrayîşî vilayê heme zindanan bî û 317î ra zêde hepsîyê PKK û PJAKî grevê vêşanîye de yî.

 

Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî. Ganî bêro vîrvistiş ke rewşa weşîya çalakgeran her ke şona xidar bena. Nê zindanan ra yew zî Zindanê Padaye yê Tîpa Tyî yê Osmanîye yo û hepsîyê ke dest bi çalakîya vêşanîye kerdî roja destpêkerdişê çalakîye ra nata raştê zextanê giranan yenî.

 

Zindanan de hêriş zêdîyayî 

 

Hemsereka Şaredarîya Pasûrî Sadiye Suer Barana ke qayûm tayînê herinda aye ame kerdene û nika Zindanê Padaye yê Tîpa Tyî yê Osmanîye de tewqîfkerdeya bi rayîrê pêvînayîşê keyeyê xo dîyar kerde ke roja destpêkerdişê çalakîya grevê vêşanîye ra nata hetê îdareyê zindanî ra raştê zextanê giranan yenî û va: “1ê Adare ra dima pêroyê hepsîyan dest bi grevê vêşanîye kerdî. Roje de 4 reyan hûmartişê serê payan yê kêfî yena kerdene. Wextê hûmartişîde bi zorî hepsîyan vejenî cayê hewagirewtişî. Ma timî raştê vatişanê tacizî yenî. Çalakîya grevê vêşanîye vera 15 rojan cezaya hucre dîya mi.”