ÎZMÎR - Cinîyê karker ê Îzmîrî dîyar kerdî cinîyê ke karker bê çin ê û vatî ganî şert û mercê xebatan bêrê başkerdiş, 8ê Adare biba roja betalî. Cinîyan dayî zanayîş ke eke cinî kuçeyan de bê, do her kes azad bo û vera mobîng û tacîzî zî vengdayîşê têkoşînî kerdî.

 

8ê Adare Roja Cinîyan ya Dinya nêzdî bena û cinî zî seba heq û waştişê xo,  amadekarîyan kenê ke vejîyê wareyan. Îzmîr de zî cinîyan derheqê 8ê Adare Roja Cinîyanê Dinya de şîrove kerdî û eynî wextî de vengdayîşê têkoşînî kerdî.

 

Xebatkara şaredarîye Ferîde Nalbantogluye da zanayîş ke cinî tewr zêde rastê tedayan yenê û wina va: "Sektorê taybet de persê sey 'şima zewicnaye yê, domanî estê, karê şima rê çîyêk ben asteng' yenê perskerdene. Ganî kreş bibê ke cinî bieşkê bixebityê. Her kargerî benê taybet û tewr zêde pere danê kreşan. Eke ma domanan bidê wendegehê sereyîn, tewr tay ganî 16 hezar TL bidê."

 

'Cinî hem keye de hem zî teber de xebityenê'

 

Pispora Averşîyayîşê Domanan Gîzem Ertaşe arde ziwan ke cinî hem keye de û hem zî kargerî de xebityenê û va komelî de ewnîyayîşê domanan tena aîdê cinîyan o û va: "Cinî xo resenê her kar. La seba ke zaf zehmet o mecbur manenê ke mabêne bidê kar. Seba na rewşe bêro sererastkerdiş ganî camêrdî bêrê perwerdekerdiş. Ganî cinî pîya bikewê piştdayîş. Saetê karî zêde yê. Ganî saetî bêrê kêmkerdene."

 

Sîmgeye zî va wexto ke wendekar bîya, mecbur menda anketorî bikero û va: "Keda wendekaran nîna vînayene. Ma hetê camêrdan ra anket vila kerdêne ra rastê mobîngî ameyne. Vatêne xo weşik bikerê, cilê weşikan xo ra dê. Merdimî qij fînayne. Anketêke kêm bîne pereyê ma nêdayne."

 

Fatoş Acara ke kedkara keyeyî ya da zanayîş ke pereyê ewnîyayîşî hespkerdişê keye yê cinîyan o û va xeylê cinî pêwa ke betalê zî no nîno vînayîş.

 

Fadîme Ulutaşe ke tezgah akerda û zeytûnan roşena, arde ziwan ke seba cinî teberê keyeyî de zî bieşkê bicuyê ganî bixebityê.

 

Gonul Işike zî da zanayîş ke Roja Cinîyan ya Dinya de cinî xebityenê û va ganî 8ê Adare betalî bibo. Nîhal Sarilitopuze zî arde ziwan ke dinya de cinîyê ke kedkar nîyê çin ê û va ê zî do 8ê Adare de bixebityê.

Yeşîm Kule zî dîyar kerde ke goreyê verê vînayîşê karî zehmet bîyo û êdî kesê ke unîversîte qedênayê zî betal ê.