AMED - Xoverdayîşê grevê vêşanîye yê bêdem û anêgêrayîşî yê hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dest pê kerdbî, kewt roja 114. 

 

Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî. Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî. Xoverdayîşê Leyla Guvene 114 rojan xo dima vera da. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. 

 

Leylaya ke çalakîya aye dewam kena heta nika çar hetê Tirkîya û xeylê welatê bîn piştdayîş dayî çalakî. Heta roja ewro seba Leylaye hetê xeylê nuştox, siyasetmedar mesajê piştdayîşî amayê dayîş. Kesê ke piştdayîş danê Leylaye vanê ke tecrîd Sucê merdimayî yo û hukmatî ra tecrîd bêro wedartiş. Hepsîyê PKKî û PAJKî, dîyar kerdî ke 1ê Adare de seba piştdayîş bidê çalakîya grevê vêşanî û tecrîd serê Abdullah Ocalanî ra bêro wedartiş do bikewê grevê vêşanîye.

 

Cinîyê femînîst yê Stenbol û Konyayî Firdevs Hoşer, Kamile Dinçsoy, Şengul Yuksel, Guliz Saglam, Ozgul Saki, Songul Aydin, Hatice Odemiş şî serdayîşê Leyla Guvene. Cinîyê ke waştî cinîyê ke waştî derbazê verê Leylaye bibê hetê polîsan ra kontrolê  GBTî înan rê ame ferzkerdiş. Hetê cinîyê Meksîkayî ra parçeyêke mor ke ser de nuştişê "wexto ke cinîyêke biwazo aver şêro tu çîyêk nêeşkeno cinî asteng bikero" ame dîyarkerdiş.

 

Bi seyan çalakgerî grev de yê

 

Ganî bêro vîrvistiş ke rewşa weşîya çalakgeran her ke şona xidar bena. Sewbîna çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 101. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 75. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 317 hepsîyan ra zêde dest pêkerdbî zî roja 76. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.