MÊRDÎN - Resmîya Baybarse dîyar kerde ke di lajê aye zî grev de yê û veng da ke ganî waştişê hepsîyê ke grev de yê bêrê qebulkerdene û wina va: "Înan seba xo ney, seba ma bedenê xo dayê verê mergî. Ganî her kes goş bido vengê înan."

 

Bi waştişê wedartişê tecrîdê Rayberê PKKyî Abdullah Ocalanî ser mintiqa û zîndanê Tirkîya de grevê vêşanîye ame destpêkerdene û hetê seyan hepsîyan ra nika çalakîye dewam kena. Desan zîndanan de her roje hûmara hepsîyê ke konê grev zêde benê. Xeylê hepsî rewşa înan ameya sewîyeyêke krîtîk û yeno dîyarkerdene ke problemê weşîye êdî ameyê meydan.

 

Resmîya Baybarse da zanayîş ke lajêke aye serrêke yo hucre de yeno girewtene û lajê aye bîn zî 20 serrî ceza girewto û va: "Her di lajê mi nika grev de yê. Waştişê hepsîyan heqdar o. Seba ma vengê înan bidê eşnawitiş gerek ma dest bidê yewbînan."

 

‘Kes vengê înan nêeşnaweno'

 

Resmîyaye va ke lajê aye Abdulkadîr dewaya Nisêbîn ra yeno muhakemekerdene, serrêke zîndanê Osmanîye de hucreyê yew kesî de verdayî û aşmêke grev de yo 7 kîlo dayo. Resmîyaye wina va: "Seba ke tecrîd bêro wedartiş bi aşmêke grev de yo. Ganî tecrîd bêro wedartiş. Ma nêwazenê tabutê domanê ma bêrê. Kes vengê xo nêkeno. Bi serrêke yo hucre de yeno girewtiş. Kes vengê ey nêeşnaweno."

 

'Wa no teda û zulm peynî bibo'

 

Resmîyaye da zanayîş ke lajê aye Abdulrahîm zî 20 serrî ceza girewto û va o zî aşmêke zêde yo grev de yo û wina va: "Telefonê peynî de lajê mi nêeşkayne qisey bikero. Zîndanê Sîlîvrî de maneno. 20 serrî ceza dayê ci. Va heta ke tecrîd nêro wedartiş do grev dewam bikero. Ganî tedayî peynî bibê. Wa no teda û zulm êdî peynî bibo."