Melîke Aydin

 

ÎZMÎR - Zeytînkoyî de yewin namzeda cinî ya keyatî Gullu Karadage vera sîyasetê sîyakerdişê camêrdan û polîtîkayê teda dewêke newe xeyal kena. Ê ke tewr zêde piştdayîş danê Gullu zî embazê aye namzedê azayî yê.

 

Namzeda keyatî taxa Zeytînkoyî yê Selçukê Îzmîrî Gullu Karadage dîyar kerde ke no prosesî de xo sey cinî danê nasnayîş, projeyê xo qalî kenê û va vera îradeyê heme kesî rêzdar ê.

 

Zeytînkoyo ke wayîrê bingehêke kozmopolît o, Yoruk, Kurdê ke 1960î de Erzîngan ra koç kerdê, koçberê Yugoslavya û Lazê Behrêsîya ra ameyê cuyenê. Verê Gullu de 5 namzedê aza yê cinî zî estê. Gullu wina vana: "Ma seba kesê ke kahweyan de nişnenê ro ney, ma seba keda cinîyan ke nîna vînayîş, seba ciwanê betal û domanan bixebityê. Heme welatê averşîyî de bi pratîkê cinîyan aver şi. Coka ma wazenê cinî bêrê weçînayîş. Projeyê ma zêde yê. Ma do seba heme dewijan xizmet bikerê."

 

'Seba domanan do werd û xizmetê serwîs bêro dayene'

 

Gullu arde ziwan ke domanê dewe seba wendegehî şinê dewa Efesî û zaf zehmetîyan ancenê û wina va: "Ma do hewl bidê ke seba domanan heme roj wendegeh de manenê werd û serwîs amade bikerê. Mîyanê projeyanê ma de keyeyê rehabîlîtasyonî seba astengdaran û eynî wextî de keyeyê kultur, huner, weşîye û hetkarî zî estê. Dewe de 8 camêrdî namzed ê. Projeyêke derheqê cinî û domanan de çin o. Wexto ke ma dewe geyrenê cinî zaf kêfweş benê. Bi taybetî piştdayîş danê cinîyan."

 

'Teda û polîtîkayê sîyakerdişê kulturê camêrdan o'

 

Gonul Akbabaye zî da zanayîş ke seba cinî tewr zêde bêrê vînayîş bîya namzed û va: "Weçînayîşan de tewr girîng o yo ke îradeyê dayê meydan. Wexto ke projeyê ma vînayî, raqîban waşt ke Gullu tena verdê. La ma vera înan kîşte Gullu ca girewt. Teda û polîtîkayê sîyakerdişî kulturê camêrdan o. Wexto ke cinî ma vînenê ma ra hêz gênê."