WAN - Mezraya Albucakî ya dewa Korlu ke 30 kîlometreyî qezaya Şubeyê Wanî ra durîya, dêrê tarîxî ser axur yenê xebitnayîş.

 

Qezaya Şubeyê Wanî bi pêro de 36 dêr estê. Xeylê ci rijyayê û hema serê lingan de mendê zî estê. Mezraya Albucakî ya dewa Korlu ke wexto wendegeh çinbi, Dêrê Hîşet Azîz Etîenne 5 serran sey wendegehê sereyîn ameyo xebitnayîş û domanê 35 dewan ci ra mezun bîyê. La wexto ke dêr bêwayîr mend, hetê dewijan ra sey axur ame xebitnayîş. Eynî wextî de dewijan êmê heywanan, sergo, vaş û kolî kerdê ci. Dêrê armenîyan ê taxa Adnan Medresî zî nika sey keyeyê tenûre yeno xebitnayîş.

 

'Leşkeran sey cayê nobete xebitna'

 

Welatîyêke dewe zî dîyar kerd ke verê şarî dêr tamîr kerdo, wayîrê ci vejîyayê la 5 serrî verê dêr hetê leşkeran ra sey cayê nobedaran ameyo xebitnayîş. Welatîyê dewe ard ziwan ke leşkeran zirar dayo dêr û va eke hetê rayedaran ra biameyne pawitiş, turîzm zî aver bîşîne.