Safiye Alagaş

 

STENBOL - Avûkat Tuba Torune dîyar kerde ke sucê îstîsmarê zayendî bi zewacî normalkerdiş qetî nîno qebulkerdiş û wina va: "Nika seba pawitişê sazgehê keyeyê, hîn hewldayîş yeno kerdiş. Pêwa raporê GREVIO û Pêameyîşê Stenbolî ke ya ke zewacê domanan qedexe keno, zî bi israr îhlalkerdiş dewam keno."

 

Reaksîyonê cinîyan hemverê pêameyîşê ke sey 'efûyê zewacî' ame babete û sucê îstîsmarê zayendî de rewşa mexdur bi gumanbar dir bêro zewicnayîş do ceza bêro talokkerdiş, dewam keno. Pêameyîşê 2016an de bi destê meclîsî amebi rojeve û serê reaksîyonê şarî amebi antiş. La verê weçînayîşê 31ê Adare pêameyîşê hetê AKPyî ra reyna ame rojeve.

Avûkat Tuba Torune derheqê babete de wina va: "Sucê îstîsmarê ke yew sucê tewr giran teşkîl keno, zewac bi tu hewa nîno qebulkerdene. Eke no suc Qanûnê Cezaya Tirkan de ca bigîro, ganî sûcdarî bêrê cezakerdiş."

 

'Do fikrê bêcezabîyayîşî vejo meydan'

 

Tubaye dîyar kerde ke no pêameyîş do fikrê bêcezabîyayîşî zî vejo meydan û do merdimî vajê 'ez kam ci sucî bikerî do bêro efûkerdiş, do ceza bêro fînayîş, do ceza nêro dayîş' û seba nê sucê hemverê cinî, doman û xeylê hetê bîn zêde bibê.

 

Tubaye tewr peyîn wina va: "Wexto qanûn bê kêmasî bi ca bêrê, do hepisxane hende pirr nêbê. Do kes bizanê ke wextê ke suc bêrokerdiş, coka do suc zî kêm bibê. Do hepisxane zî veng bê. Eşkenê vajê Efûyê zewacî seba reyke yo. La siba çend rey bi ca bêro ma nêzanê. Vera efûyan ganê şert û merc bêrê başkerdiş. Eynî wextî de pêameyîşê Stenbolî zewacê domanan qedexe keno. Grevîo zî derheqê Tirkîya de raporêke da. Pêwa raporê zî Pêameyîşê Stenbolî yeno ferzkerdiş."