AMED - Ciwanê HDPyijî Leyla Guvene ke roja 107ê çalakîya xo de selam kerdî û vatî înan xoverdayîşê Leylaye cesaret girewtê û wina va: "Ma do sey taqîbkerdoxê Leylaye waran de bê. Ma do meşaleyê şexsê Leylaye de veşeno, biresnê des hezaran. Rayberîyê ci ma do bikerê."

 

Parlamentera HDPî ya Colemêrgî û Hemsereka KCDî Leyla Guvene ke bi amancê şiknayîşê tecrîdî 8ê teşrîna peyêne 2018an de kewtebî grev, çalakîya aye roja 107ê de dewam kena. Pêwa ke rewşa Leylaye resaya sewîyeya krîtîk zî game xo peyser nêerzena. Her ca de seba Leylaye piştdayîşê pîl yeno dayîş û tewr zêde zî hetê cinîyan ra piştdayîş yeno kerdene.

 

'Waştişê meşrû û heqdar o'

 

Cinaya ciwan ya HDPyije Buse Ersoze dîyar kerde ke aye çalakîya Leyla Guven û 300 ra zêde hepsîyan selam kena û wina va: "Ez zî yew cinîyêke nê xoverdayîşî ra cesaret gêna ya. Waştişê înan heqdar û meşrû yo. Leyla Guvene bedenê xo daya verê mergî. Wazena tecrîdê Birêz Ocalanî ser o wirzo. No zî waştişêke meşrû yo. Tecrîd sucê merdimayî yo. Ma ciwanî vanê ke waştişê Leylaye waştişê ma yo. Waştişêke meşrû yo û gerek bi ca bêro."  

 

Berîtan Yaşare zî da zanayîş ke grevan komelî ser tesîrêke pîl kerdo û wina va: "No tesîr açeryayo meşale. Şexsê Leylaye de ma do meşale biresnê des hezaran. Ma cinîyê ciwanî rayberîyê nê bikerê. Ma do taqîbkerdoxê Leylaye bê. Heme çalakîyê ke yenê waştiş seba Leylaye bi ca bêrê yenê astengkerdiş. Rastî hêrişan yenê. Goreyê mi xoverdayîş gerek tewr zêde pîl bibo. Ma bi pîlkerdişê xoverdayîşî eşkenê bikerê babeta dewlete. Ganî ewro heme kes seba Leyla û hemrayîrê aye vejîyê meydanan."   

 

Bêrîvan Kiziltepe zî wina va: "Ganî cinî veng bidê vengê Leylaye. Êdî grev sewîyeyêke krîtîk de yê. Tîya ra tepya beno ke heme çî bibo. Em bi endîşeyê nê cuyenê. Leyla Guvene wazena tecrîd bêro wedartiş, waştişê aye waştişê ma pêroyî yo. Ma heme wazenê Birêz Ocalan azad bibo. Ma perwerdeyê bi ziwanê xo wazenê. Ganî ma xoverdayîşê Leylaye girs bikerê."