Şêrîn Zêrevan

 

QAMIŞLO - Seba 21ê Sibate ke Roja Ziwanê Dayike ya Dinya, mamosteyê cinî şîrove kerdî û roja ziwanê dayîke, dayîkan, mamosteyan û wendekaran rê pîroz kerdî.

 

Mamosteyê wendegehê Ehmed Sebrî ke bajarê Qamişloyî, derheqê 21ê Sibate Roja Ziwanê Dayîke ya Dinya de şîroveyî xo vatî û vatî ke ziwanê dayîke nasname yo û wayîrê nasnameyê xo vejîyê.

 

Endama Îdarekera Wendegehê Ehmed Sebrî Kobra Elîye roja Ziwanê Dayîke ya Dinya pîroz kerde û wina va: "Bi serran o ke şarê Kurd heqê xo yê ziwanê dayîke ra mehrum mendê. Waştişê serdestan o yo ke şarê bindestan ziwanê înan ra dûr bifînê û çinbîyayîşî dir rî bi rî verdê. Seba wexto ke ziwan vindî bibo kultur, tarîx û nasnameyê ê şarî zî ci dir vindî benê. Her çar parçeyê Kurdistanî de seba tedayê sîstemê serdest ke ziwanê kurdî qedexe kenê şarê Kurd nêeşkenê bi ziwanê xo dayîke biwanê. Vakurê Kurdistanî ke bi milyonan kurdî cuyenê ziwanê kurdî heme warê fermî qedexe yê û Sûrîye zî Rêjîmê BASSî nê kerdêne û ziwanê kurdî qedexe kerdib."

 

'Şorişê Rojawanî ziwanê her şarêke pawit'

 

Kobraye bale ante serê tesîrê Şorişê Rojawanê Kurdistanî serê ziwan û kulturê şaran û va: "Xêrê têkoşînê azadîye ke serê herra vakur û rojhelatê Sûrîye virazya, nasname, kultur, ziwan û bîyayîşê her netewêke pawit. Sewîyeya ziwanê dayîke ke ameyo ewro, vera temamê sîsteman vinderto û serkewte bîyo. Serê herra vakur û rojhelatê Sûrîye de her kes bi ziwanê xo dayîke perwerde beno û ziwanê xo heme waran bi ca ano."

 

'Verê zor û zehmetîyan ziwan pawit'

 

Heto bîn ra mamosteya bi nameyê Hûda Ehmede zî wina va: "Pêwa zor û Zehmetîyê ke Rojawa ameyî cuyayîş zî ziwanê dayîke her netewêke pawit. Tesîrê sîstemê serdest çiqas zêde bibo zî vera ci îrade û heskerdişê ziwanê dayîke serkewte bi. Şorişê ziwan yew destkewtişê tewr pîl ê Şorişê Rojawanê Kurdistanî bi. Hewn û xeyalê bi hezaran bi ca ame. Ewro her kes bi ziwanê xo yê dayîke perwerde beno û nusneno. Roja ziwanê dayîke ro ma û temamê netew û şaran pîroz bo."