MERKEZÊ XEBERAN - Konferansê hewteyê ravêrteyî de Kamaraya Lordan a Baskê Corênî yê Parlamentoya Şahanşahî ya Yewbîyayî de qerar ame girewtene Weqfê Demokrasîyî yê Abdullah Ocalanî bêro awankerdene.

 

Serrgêra 20ine ya komploya mîyanneteweyîye ya hemverê Rayberê Şarê Kurdî Abdullah Ocalanî de, Baskê Corênî yê Parlamentoya Şahanşahî ya Yewbîyayî de, Kamaraya Lordan bi nameyê “Halkerdişê Krîzê Rojakewtena Mîyanêne: Fikrê Abdullah Ocalanî” bi tewrbîyayîşê xeylî sîyasetkar, akademîsyen, aktîvîst û xeberdaran konferansêk ame viraştene. Mîyanê qiseykerdoxan de endamê Kamaraya Lordan Maurîce Glassman, parlamentera Sînn Feînî Chrîs Hazzarde, parlamenterê HDP’yî Hîşyar Ozsoy, Profesor Davîd Greaber, Profesoro Alman Udo Steîncbach, siyasetkaro Efrîkaya Başûrij Ebrahîm Îsmaîl Ebrahîm, hemsereka Meclîsê Sûrîya Demokratîke (MSD) Îlham Ehmede û avukatanê Ocalanî ra Îbrahîm Bîlmez hadre bî.

 

Xebatê awankerdişê Weqfê Abdullah Ocalanî dest pêkerdî. Mîyanê xebatanê weqfî de sendîkayê ke kampanyaya Ocalanî rê Azadîye rayra berdêne zî do bibê. Kîşta nê de endamê Kamaraya Lordan, parlamenter û akademîsyenî zî do xebate de ca bigîrê. Weqfê Abdullah Ocalanî ke yeno pawitene menganê verê ma de bêro awankerdene, do seba vilakerdişê fikranê Ocalanî xebatan bikero.

 

Konferanso ke bi nameyê “Halkerdişê Krîzê Rojakewtena Mîyanêne: Fikrê Abdullah Ocalanî” ame viraştene de babetê sey Konfederalîzmo Demokratîk, krîzê netewe-dewlete ya Tirkîya, Îran, Îraq û Sûrîye, hemverîya dewleta Tirkî ya Kurdanê Tirkîya û Sûrîye û Sîstemê Îşkenceyî yê Îmraliyî ameyî qiseykerdene.