BEDLÎS - Namzeda HDPî ya Hemşaredarîya Bedlîsî Zekîye Îlbasane dîyar kerde ke dimayê ke qeyûm tayînê şaredarîya Bedlîsî ameyo kerdene, seba şarî tu xizmet nêameyo kerdene û va ê do şarî dir projeyê neweyan bi ca bîyarê. Zekîyeye arde ziwan ke do bi şarê Bedlîsî dir xeylê probleman biqedênê.

 

Namzeda HDPî ya Bedlîsî Zekîye Îlbasane zî bi projeyê girîng şina weçînayîş. Zekîye Bedlîs re ya û nêzdîyê 10 serrî yo sîyaset de ca gêna. Zekîye dîyar kerde ke êdî wextê şaredarîyan ke qayûman ra bêrê girewtiş ameyo.

 

Zekîye dewam de da zanayîş ke seba dewlete îrade û sîstemê înan qebûl nekerda qayûm tayîn kerda û wina va: "Ez vera nê polîtîkayan HDPyî de bîya namzed. Îradeyê şarî ameyo xespkerdene la do 31ê Adare de şar reyna şaredarîyanê xo bigîro. Ma do wayîrê îradeyê xo vejîyê."

 

'Bedlîs bajarêke wêran bîyo'

 

Dimayê ke qayûm ame tayînkerdiş dima bajar de tu xebate nêame meşnayîş û bajar de çîyêk nêmendo. Bajar de rayîr zî nêameyê viraştiş, problemê kanalîzasyonî zî yew problemê sereyîn ê. Sere de esnaf, her kes na rewşe ra gerrekerdox o. Namzeda HDPyî Zekîye dîyar kena ke ayebi projeyê girîng yena û va Bedlîs bajarêke tarîxî yo û seba ke zirar nêvîno do xebatan bimeşnê.

 

Zekîyeye tewr peyîn va ke vernê de do şaredarî qayûm ra bigîrê û dima ra projeyanê xo bi ca bîyarê û wina va: "Yew problemê sereyîn ê Bedlîsî betalî yo. Na mintiqa bi pesdewarî debara xo kena. La polîtîkayê dewlete tîya de pesdewarî qedêna. Şar bi krîz û betalî dir têkoşîn keno. Ma do pîya nê probleman çareser bikerê. Ma do şarî dir bajarêke newe awan bikerê."