AMED - Xoverdayîşê hemsereka KCDyî û Parlementera HDPyî ya Colemêrgî Leyla Guvena ke seba wedarnayîşê tecrîdê serê Rayberê Şarê Kurdî Abdullah Ocalanî dest bi grevê vêşanîye yê bêdem û anêgêrayîşî kerdbî, roja 104. de xoverdayîşê xo domnena. Sewbîna çalakîyê grevê vêşanîye ke seba eynî waştişan dest pêkerdbî zî bi qerardarî dewam kenî.

 

Xoverdayîşê çalakîyê grevê vêşanîye yê bêdem û anêgêrayîşî ke bi serkêşîya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene dest pêkerdbî dewam kenî. Xoverdayîşê Leyla Guvene 104 rojan xo dima vera da.

 

Mudaxeleyê tibî qebul nêkena

 

Leylaya ke seba demêke derg o grevê vêşanî de ya, problemê aye weşîye zî zêde bî 13ê sibate de zî seba qelibnayîş, dejê sîne û zehmetîyê boye antişe wedarnabî nêweşxane. Leylaye ke seba demêkeserê hişê xo ra şîbî wedarnabî nêweşxane û wexto ke amîbî serê hişê xo mudaxeleyê tibî red kerdebî û aye ardibî keye.

 

Piştdayîş dewam kenê

 

Leylaye roja 8 teşrîna peyêne 2018an ke dest bi çalakîye kerdebî a roje ra nat piştdayîşê bi çalakîya aye zî dewam kenê û xeylê cayê dinya de roşnvîr, nuştox, sîyasetmedar û akademîsyênî ci rê mesajê piştdayîşî eşrawenê.

 

Çalakîya grevê vêşanîye dewam kenê

 

Çalakîya grevê vêşanîye ke ameybî destpêkerdiş dewam kenê. Çalakîya endamê HDPyî Nasir Yagirzî ke seba eynî taleban Hewlêrî de dest bi grevê vêşanîye kerdbî zî kewte roja 91. Çalakîya 14 çalakgeranê bajarê Strasboûrgî yê Fransa û Îmam Şîşî yê Gallerî zî kewte roja 65. Grevê vêşanîye yê bêdem û anêgêrayîşî ke zindananê bakurê Kurdistan û Tirkîye de bi tewrbîyayîşê 300 hepsîyan dest pêkerdbî zî roja 66. xo dima vera da. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye pê yenî.

Ganî bêro vîrvistiş ke rewşa weşîya çalakgeran her ke şona xidar bena.