AMED - Xoverdayîşê hemsereka KCDyî û parlementera HDPyî Leyla Guvena seba wedarnayîşê tecrîdê serê Rayberê PKKyî Abdullah Ocalanî grevê vêşanîye de ya kewt roja 100.  Rewşa weşîya Leylaye çend şona xirabêr bena.

 

Xoverdayîşê grevê vêşanîye ke hemverê tecrîdkerdişê Rayberê PKKyî Abdullah Ocalanî de bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke dest pêkerdbî, roja 100. de dewam kena. Leylaye seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene, 8ê Teşrîna Peyêne de Zindanê Amedî de dest bi grevê vêşanîye kerdbî û badê ke 25ê Çele de serbest ameybî veradayene keyeyê xo de çalakîya xo dewam kena. Badê Leylaye çalakî vilayê Amed, Hewler, Firansa, Mexmûr, Şengalê û Silêmanî zî bî.

 

Sewbîna çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 8. de, çalakîya grevê vêşanîye ya Strasbaurgî ke 14 çalakgerî grevê vêşanîye de yî û ya Îmam Şîş yê Gallerî roja 61. De û çalakîya koma ewil ke 16ê Kanûne de zindanan de dest pêkerdbî zî roja 62. de dewam kena. Nika pêropîya zindanan de 300 ra zêde hepsîyê sîyasî grevê vêşanîye yê bêdem û anêgêrayîşî de yî.

 

Ewro parlamenter û rayîrberê HDPyî zî mîyan de xeylê kesî do roja 100. de bi çalakîya rayîrşîyayîşî şêrî keyeyê Leylaye.