ŞIRNEX - Hezne Arslane ke kêna xo Hacere qedexeyê tebervejîyayîşê kuçeyan ê Cizîrî de vindî kerde, her panşeme şina serê gorê laj û birayê xo mabêne her di goran de ronişnena û seba gorê hîrêne têkoşîn kena.

 

Qedexeyê tebervejîyayîşê kuçeyan ê Cizîrê Şirnexî de ke 14ê Kanûna 2015an de ame îlankerdiş û 79 rojan dewam kerd û bodruman de 100 ra tewr zêde kes ameyî qetilkerdiş û cenazeyê înan ê veşnayene ame vînayîş. 7ê Sibata 2016 de saete 22.00’ê şewe de mintiqaya bodruman de vengê teqînêke pîl ame û dima ra yew bi yew cenaze ameyî vetiş. Keyeyan bi rojan seba teşîsî têkoşîn dayî û hîn cenazeyî hîna nêameyê vînayîş. Seba keyeyê ke domanê înan cuya xo vindî kerdî, aşma sibate seba înan manayêke cîya ya. Keyeyê ke 3 serrî yo esteyê domananê xo geyrenê estê.

 

Cenazeya kêna xo Hacer Aslane geyrena

 

Hezne Arslane lajê xo û birayê xo zî qedexe de vindî kerdê. Bodruman de zî kêna xo Hacer Arslane vindî kerde. Hezne 3 serrî yo kêna xo geyrena û seba gorêke kêna aye bibo têkoşîn kena. Hezne dîyar kerde ke wexto kêna xo bivîno do verê lajê xo û birayê xo de gorêke aye rê virazno û dîyar kena ke dimayê Sibata 2016an dima her Sibate seba aye sîya û bi hewre ya.

 

Hezne her panşeme şina serê gorê lajê xo û birayê xo, mîyanê her di goran de roşnena û pawena ke gorê kêna aye zî bibo û seba nê têkoşîn kena. Hezne dîyar kena ke aye ne şan de ne zî bi roj eşkena rakewo, şan de seba kêna xo fikrîyena nêkewena ra. Hezne arde ziwan ke heta esteyê kêna xo bivîno do têkoşîn bikero.