AMED - Mamoste û resam Fatoş Îrvene, Leyla Guvena ke 93 rojî yo grevê vêşanî de ya û rojnamegera tepişnayî Kîbrîye Evren, Evîn Kaya û Hîlal Olmeza ke 55 rojî yo grev de yê leçege ser ameyî xêzkerdene.

 

Hemsereka Kongreya Komelê demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene ke 8ê Teşrîna Peyêne de vera tecrîdê serê Rayberê PKKî Abdullah Ocalanî dest bi grevê vêşanîye ya bêdem û bêagerayîş kerde çalakîya aye roja 93in de dewam kena. Grevo ke rayberîya Leyla Guvene de ame destpêkerdiş, temamê zîndanan rê vila bi. Rojnameger Kîbrîye Evrene, Hîlal  Omez û Evîn Kaya ke verê ke Leylaye bêro tahliyekerdene eynî qoxişe de mendêne zî dest bi grev kerdibî û çalakîya înan roja 55ine de dewam kena. Ame dîyarkerdiş ke rewşa weşîya her 3 hepsîyan zî xeter de ya.

 

Xoverdayoxê grevê vêşanîye xêz kerde

 

Leylaya ke 20 Çele de amî tehliyekerdiş, çalakîya xo keye de dewam kena. Leylaya ke weşîya aye xeter de ya va ke heta waştişê aye nêrê qebulkerdiş, aye do çalakîya xo dewam bikero. Ame neqlkerdiş ke Kîbriye, Hîlal û Evîn ê ke rojê krtîk yê rojê 40in û 50in pey xo de verdayê her ke şino weşîya înan xira bena.

 

Resam û mamosta Fatoş Îrvene ke bi Leyla, Kîbriye, Hîlal û Evîn dir zîndan de ya serê leçege de bi qelema xo her çar cinîyê xoverdayoxan xêz kerde. Fatoşe resimê ke xêz kerdo binê ci de wina nuşto, "Welatê mi de cinî verê rojî wirzenê' û "Xoverdayîşê Sara cayê ke mendo dewam keno". Fatoşe nameyê her çar cinîyan zî binê resimê ke xêz kerdo nuşto.