ŞIRNEX - Keyeyê kesê ke qedexeyê tebervejîyayîşê kuçeyan ê Cizîrî de cuya xo vindî kerdî, bi 3 serrî yo ke nêeşkenê cenazeyanê xo bigîrê û tewr peyîn Walîtî seba keyeyê şêrê goristano ke rayîrê ci çin o, şertê 'Ma wesayît nêdanê. Keyeyî ra di kes eşkenê şêrê cenaze bigîrê' dayî.

 

Cizîrê Şirnexî ke 3 serrî verê qedexeyê tebervejîyayîşê kuçeyan ame îlankerdiş û qedexeyan de bi seyan kesî cuya xo vindî kerd. Qedexeyo ke 3 aşmî dewamkerd de bi seyan cenazeyî ameyî teşîskerdene zî bi sebebê qedexeyan, goristanê Şirnexî de ameyî definkerdiş. 45 gorê kesê ke Cizîr de cuya xo vindî kerdî, Goristanê Zîyareta Nâla Rû de ameyî definkerdiş. Keyeyî ke seba cenazeyan bigîrê muracatê Walitî kerdî û dîyar kerdî ke name zî serê goran de nêameyo nuştiş.

 

Walîtî: Keyeyî ra di kes eşkenê bêrê

 

Muracatê keyeyan bi sebebê cîya nêameyî qebulkerdiş. Keyeyan dîyar kerdî ke muracatê peyîn ê Walitî de, Walîtî şert û merc yew bi yew kerdê rêz û şertê ke eşkenê cenazeyan uca ra vejê dayê vernî û vato ke tena keye ra di kes eşkenê bêrê.

 

Walitî di şertê wina da vernîye keyeyan:

 

*Ma do cenazeyan bidê, la gerek keye ra di kes bibê û o wext polîs û leşker zî uca de bê.

 

*Ma seba cenazeyê ke yenê vetiş wesayît nêdanê. Şima do wesayîtê xo bîyarê.

 

'No wijdan nîyo'

 

Keyeyan eraksîyon vera şertê ke ameyê dayîş dayî û dîyar kerdî ke rayîrê goristanî çin o, ê bi xo zor şênê, do wesayît senîn şêrê. Keyeyan da zanayîş ke xeylê cenaze uca de estê, la dorê goristanî de têlêke zî çin o û wina va: "Goristan de awe çin a. Rayîr çin o. Name zî goran ser nêameyo nuştiş. Ma zaf acis bîyê. Ma nêwazenê bi di kesan cenaze bigîrê. No bêwijdanî yo."