MÊRDÎN - Şehnaz Denîza ke Nisêbîn de yewin namzeda cinîyan ê keyatî ya, dîyar kerde ke a wazena hukmdayîşê vernî ê komelî 'cinî nêeşkenê nê karî bikerê' bişiknê û wna va: "Ez do sey cinîyêke ramojnî ke cinî eşkena, keyatî xeylê kesan ra tewr baş bikero."

 

Weçînayîşê mintiqa ê 31ê Adare tay mend û tena namzedê şaredarîyan ney, keyatî zî do bêrê weçînayîş. Nisêbîn de 12 namzedê keyatî estê û înan ra zî yew ci ra cinî ya. Şehnaz Denîza namzeda taxa Yenî Turanî ya. Şehnaze da zanayîş ke ganî cinî her warî de bibê.

 

'Ez wazena bi cinîyan dir bî'

 

Şehnaze sebebê namzedîya xo wina va: "Ez Nisêbîn de ameya dinya û pîl bîya. Ez wazena ke Nisêbîn de cinîyan dir bixebityî. Ez fikrîyena ke qeza de ganî cinî heme îmkanan bixebitnê. Coka ez bîya namzed e. Ez keye de roniştiş ra hes nêkena. Ez her wext bi cinî û domanan dir a. Îdarekerî yê mintiqa de ez bi tecrube ya. Mi 5 serrî Nisêbîn de encumenî kerd."

 

'Do bivînê ke nê karî tewr baş cinî kenê'

 

Şehnaze tewr peyîn wina va: "Seba cinî komel awan kena, ganî xurt biba. Ganî bêro vînayîş cinî her war de eşkenê kar bikerê. Ganî zîhnîyetê 'cinî nêeşkenê nê karî bikerê' bêrê şiknayîş. Eke ez bibî keya ez do projeyê derheqê cinî û domanan de bikerî. Ma do her wext verê şarê xo de bê. Ma xo ra bawer ê. Eke ez bibî keya, ez do probleman tespît bikerî. Ma do hetê psîkolojîk de zî verê cinîyan de ca bigîrê."