WAN - Cinîyê Erdîşî piştdayîş dayî çalakîya hemsereka KCDî Leyla Guvene ke roja 89ine de grevê vêşanî dewam kena û dayî zanayîş ke heta tecrîd nêro wedartiş do şarê Kurd bi rehetî boye xo nêgînê, eynî wextî de do xoverdayîş zî heta peynî dewam bikero.

 

Hemsereka KCDî û parlamentera HDPyî Colemêrgî Leyla Guvene bi amancê tecrîdo giran Rayberê PKKî Abdullah Ocalanî ser o wedaryo 8ê teşrîna peyêne 2018an de zîndan de kewtebî grevê vêşanîye ya bêdem û bêagerayîş û grevê aye dimayê tehlîyekerdiş de zî keye de roja 89ine de dewam keno. Leyla 25ê Çele de zîndan ra amebî tahlîyekerdiş. Piştdayîşê seba Leylaye zî kuçeyan de dewam keno. Qezaya Erdîşê Wanî de zî cinîyan piştdayîş dayî Leylaye û vengdayîşê wedartişê tecrîdî kerdî.

 

'Heta tecrîd nêşikîyo do çalakî dewam bikerê'

 

Cinîya bi nameyê Derya Kanpolate da zanayîş ke ganî cinî tewr zêde hîsgêrî nîşanê grevê vêşanîye bidê û wina va: "Meclîs bêveng o. Heta tecrîd peynî nêbo, do grevê vêşanî zî peynî nêbê. Eke hema nê welatî merdimê bi wijdan bibê, o wext gerek vera tecrîdî reaksîyon nîşan bidê. Eke grev bi merdiş netîce bibo do welat bikewo mîyanê kaosêke pîl. Eke şar bibo yew, veng bidê vengê Leylaye do tecrîd bêro şiknayîş."

 

'Tecrîd bi pêvînayîşêke 15 deqayan nîno şiknayîş'

 

Fîlîz Îşlere zî da zanayîş ke wedartişê tecrîdî tena binê berpirsîyarîyê Leyla Guvene, hepsîyan ya zî şarê Kurdî de nîyo û va: "Heme partîyê sîyasî, heme hetê komelî berpirsîyarê. Ez tecrîdê Abdullah Ocalan û şarê Kurdî ser o şermezar kena. Hema do grev çiqas dewam bikerê. Do tecrîd heta ça dewam bikero."

 

Ayfer Seyahate zî reaksîyon nîşanê tecrîdî da û va heta tecrîdo girankerde Abdullah Ocalanî ser o nêwirzo do şarê Kurd bi hawayêke rehet boya xo nêgîrê û bi pêvînayîşê 15 deqayan zî pêvînayîş peynî nêbeno.

 

Cinîya bi nameyê Şafîrnaz Tendîye zî dîyar kerde ke Leyla Guvene eynî wextî de seba ameyoxê domanan nê xoverdayîşî kerda û wina va: "Tekoşînê kurd û têkoşînê cinîyan dewam keno. Çalakîya Leylaye dinya de vila bî. Welatê cîya de cinî û ciwan piştdayîş danê na çalakîye. Seba ke Leyla heqdar a. Ganî tecrîd peynî bibo."