Ronîda Hacî 

 

HESEKÊ - Cinîya bi nameyê Baranê Sulêmane ke qijî ra heta 70 serrî ya xo pawitişê kulturê xo yê kurdî kerda wina vana: "Kultur nasnameyê merdiman o."

 

Dayîkê kurdî rolêke zaf girîng pawitişê ziwan, kultur û perwerdekerdişê komelî de kay kerdê. Nê cinîyan ra yew zî cinîya bi nameyê Baranê Sulêmana ke taxa Kebabayê bajarê Hesekî de cuyena û qijîya xo ra heta 70 serrî ya xo cil û belgê kurdî daya xo ra û pawitişê kulturê xo kerda.

 

Baranê da zanayîş ke qijîya xo de cil û belgê kurdî daya xo rar û wina va: "Heta  rojêke emrê mi bibo ez do cil û belgê xo yê kurdî bidî xo ra. Seba ke nasnameyê mi bi rayîrê cil û belgê mi dîyar benê."

 

'Pawitişê kulturî pawitişê nasname û tarîxê merdimî yo'

 

Barane dewamê qiseykerdişê xo de dîyar kerde ke pawitişê kulturî, pawitişê nasname û tarîxê merdimayî yo û wina va: "Wexto ke merdim komelêke ya zî kesêke bivîno, merdim înan bi rayîrê cil û belg û ziwanê înan nas keno. Coka şerêke taybet hetê kulturî ra serê komelî de yeno meşnayîş. Seba ke kultur û ziwanê înan bêro asîmle bibo. Ewro ganî her kes bi taybetî dayîkî kulturê xo bipawê. Seba ke averşîyayîşê kulturî tewr zêde bi destê dayîke eşkenê bipawê."

 

'Pawitişê kulturê neteweyê demokratîk girîng o'

 

Baranê qiseykerdişê xo de da zanayîş ke, wayîrvejîyayîşê kulturê neteweyê demokratîk zaf girîng o, seba ke wayîr erj û kulturê şaran vejîyeno û wina dewam kerde: "Kulturê neteweyê demokratîk vera cîyabîyayîşî yo no kultur ferz keno ke heqê her netewêke esto wayîrê tarîx, ziwan û kulturê xo vejîyo."

 

'Wayîr kulturê xo vejîyê'

 

Baranê tewr peyîn qiseykerdişê xo de wina va: "Ez veng dana heme şaran ke wayîr kulturê xo vejîyê. Ez vana ke va şarê ma bi rayîrê rêzfîlmê hîndû û tirkî kulturê xo ra dûr nêkewê. Dewleta îqtîdar wazena ke bi nê metodan nasname û tarîxê ma çin bikera."