AMED - Endamê Meclîsê Cinîyan ê Ciwanan ê HDPyî bi şîarê ‘Cuya azad bi cinîya azad mumkun a' do konferans organîze bikerê. Endamê meclîsî seba konferansî veng dayî û vatî: "Ma bi ruhê xoverdayîşê zîndanan do konferansê cinîyan de bêrê têhet."

 

Meclîsê Cinîyanê Ciwanan ê HDPyî bi şîarê 'cuya azad bi cinîya azade mumkun o' 17 Sibate de Amed de yenê têhet. Konferans do Salona Konferansî yê Vedat Aydinî ê HDPî Amedî de bêro kerdene. Temamê Tirkîya ra do beşdarbîyayîş bibo.

 

Konferans de nasnameyê cinî, taybetîyê aye û têkoşînê azadîya cinîyan sere de do xeylê problemî bêrê munaqeşekerdiş. Eynî wextî de problemê rêxistinbîyayîşî zî sey Meclîsê Cinîyan ê HDPyî bêrê munaqeşekerdiş. Do derheqê çalakîyê grevê vêşanîye ya Leyla Guvene û hepsîyê ke hepisxane de zî bernameyê çalakîyan do bêrê amadekerdene.

 

'Wazenê rêxistinbîyayîşê cinîyê ciwanan asteng bikerê'

 

Endama Meclîsê Cinîyê Ciwan Canan Oruge da zanayîş ke şarê Kurd prosesêke zehmet ra derbaz benê û serra 2015 ra  heta nika bi hezaran ciwan î ameyî tepiştiş û va: "Vera tedayan rêxistinbîyayîş zaf girîng o. Ganî cinî her cayê keye, wendegeh, kuçe û kargerîyan de verê yewbînan de ca bigîrê. Ganî ma hêzê xo ramojnê. Cinî bi seserrayan o hetê camêrdan ra yenê qetilkerdiş. Şer de vernê de ê hedef yenê girewtiş. Nika bi seyan ciwan û wendekarî hepisxane de yê. Rayberê komelî  ciwan û bi taybet zî cinîyê ciwanan asteng kenê."

 

'Ma do xo rêxistin bikerê'

 

Canane tewr peyîn qiseykerdişê xo de da zanayîş ke îqtîdarî nêwazenê ke komel bibê wayîrê hişmendî û Tirkîya de zî waştî wina bikerê. Canane wina va: "Tewr zêde zî Kurd î yenê qetilkerdiş û yenê tepiştiş. Ma bi ruhê xoverdayîşê ke zîndanan de berz bîyo, konferans de bêrê têhet."

 

Endama Meclîsê Cinîyan ra Dîlan Orake arde ziwan ke vera ciwanan polîtîkayêke teda esto û wina va: "Di aşmî verê ma kongre organîze kerde. Kongre de waştişê ciwanan vejîya meydan. Ma do vera asîmîlasyonî wayîrê kultur, tarîx û ziwanê xo vejîyê. Ma do konferansê xo de şexsê Leyla Guvene de grevê vêşanîye selam bikerê û wayîrê îradeyê xo vejîyê."