MERKEZÊ XEBERAN - Hukmatê Herêma Kurdistano Federal dest bi tepiştişê merdimanê ke tewrê protestokerdişê hêrişê artêşa tirkî yê serê Şêladizî bîyî kerd.

 

Hukmatê Herêma Kurdistano Federal hêzêk gird berd Şêladizî û dormeyê ci. Asayîş dest bi tepiştişanê kesê ke tewrê protestokerdişê hêrişê artêşa tirkî yê serê Şêladizî bîyî kerd. Goreyê zanayîşanê heta nika xeylê kesî ameyî tepiştiş. Hemwelatîyo bi nameyê Xalid Cafero ke şarê Şêladizî ra yo û tewrê protestokerdişê hêriş bibî zî hetê asayîşê PDKyî ra ame tepiştiş. Goreyê malumatanê herême hzê asayîşî eştî serê keyeyê Xalidî û ci tepiştî.

 

Hemwelatîyê ke tewrê protestokerdişê Dêralokî yê 25ê Çele bîyî û serê medyaya komelkî de şarê Dihokî ra waştî ke piştî bidî şarê Şêladizî zî ameyî tepiştiş. Asayîş tena Şêladizî nê Dihokî de zî dest bi operasyonê tepiştişan kerd. Ame zanayene ke asayîşê Dihokî eştî serê keyeyê mamoste Bedel Berwarî zî. Netîceyê eştişê serê keye de mamoste Bedel Berwarî ame tepiştiş û ame zanayene ke Berwarî seba ke waşto ke Dihok de zî protestokerdiş bibî, ameyo tepiştiş.

 

Vîşêrê Bedel Berwarî, çalakvanê komelo sivîl yê bi nameyê Kovan Salih Rêkanî û berpirsîyarê ofîsê NRT yê Dihokî zî ameyî tepiştiş. Ofîsê NRT yê Dihokî zî ame padayîş. Heto bîn de çalakîya protestokerdişê hêrişê dewleta tirkî ya serê herêma Behdînan hema zî dewam kena.