MERKEZÊ XEBERAN - Partîya Çepî ya Fransa, derheqê proje û hedefanê serra newî de yew resepsîyon organîze kerd û temsîlkarê Têgêrayîşê Cinîyan ê Kurdan û Konseya Komelê Kurdan a Demokratîke a Fransa zî beşdarê ney organîzasyonî bîyî.

 

Serekê France Insoumise û parlamenterê Partîya Çepî ya Fransa Jean-Luc Melenchon zî beşdarê resepsîyonî bî. Melenchonî qiseykerdişê xo de Leyla Guvene rê silam erşawit û va ma şima het de yê.

 

Melanchonî bale ante hemsereka KCDyî û parlamentera HDPyî Leyla Guvena ke 72 rojîyo grevê vêşanîye de ya ser û wina dewam kerd: “ Ez bi zerrî şima het de ya, bawer bikerê ke seba nê mucadeleyê bêemsalê ez şima rê spas kena. Ma zî demokrasî û mucadeleyê cinîyan pawenîme, seba naye zî weş û war be Leyla Guvene.“

 

Bi nameyê Partîya Çepî ya Fransa zî, hemvervatoxanê partîye, Danielle Simonnete û Eric Corcrelî qisey kerd.

 

Danielle ya ke nika sereka Şaredarîya Parîsî ya zî qiseykerdişê xo de bale ante grevanê vêşanîye ser û wina va: “Ganî ma mucadeleyê Kurdan xo vîr ra mekerê. Mucadeleya înan ma rê nimûne ya. Vera DAIŞî sey qehremanan şer kenê. Mucadeleyê Kurdan, mucadeleyê cinîyan esas gêna. Ma zî baş zanîme, eke cinîyî ke mebê azad, qet yew mucadele serkewte nêbeno. Pêroyê sîstemê teda û kanperestî mucadele û azadîya cinîyan ra tersenê. Ez tîya ra xoverdayîşê Leyla Guvene reyna silam kena û bi sloganê Kurdan vana Jin, Jîyan, Azadî.“

 

Pey cû bi posteranê Leyla Guvene peyamê paştdarîye ameyî dayenê û sloganî ameyî eştene.