AMED - Dersîm Daga HDPyî seba mîtîngê ‘Demokrasî, Azadî û Edalet’ ke do siba Amed de bêro kerdene, veng da û dîyar kerde ke ganî heme şar bi sloganê ‘Leyla Guvene heqdar a û ganî tecrîd wedarnê' beşdarê mîtîngî bibê.

 

HDP bi amancê bale bi anco serê çalakîya Leyla Guvene û 200 hepsîyê ke hepisxaneyê cîya de kewtê grev 19ê Çele roja Şeme Amed de mîtîngê ‘Demokrasî, azadî û Edalet’ bêro kerdene.

 

Parlamentera HDPî ya Amedî Dersîm Dage seba  mîtîngê roja şeme ke do Meydanê Îstasyon de bêro kerdene veng da û dîyar kerde ke ê seba wedartişê tecrîdî do xoverdayîşê Leyla Guvene girs bikerê û va: "Ganî no xoverdayîş bibo xoverdayîşê azadîya heme şaran. Çalakîya Leylaye heme hepisxane de vila bena. Ma do bi adirê ke Leylaye wekerda, do tarî de bibê roşn. Bêrê ma pîya bibê vengê xoverdayîş û veng bidê vengê înan."

 

'Ma do bibê vengê Leylaye'

 

Aktîvîsta TJAyî Remzîye Sizici zî veng da heme cinîyan ke wayîrê çalakîya Leylaye vejîyê û wina va: "Leyla Guvene seba aştîye, seba wedartişê tecrîdî bi 72 rojî yo grev de ya. Çalakîya Birêz Leyla Guvene çalakîya ma hemin a. Waştişê aye waştişê ma hemine yo. Leyla Guvene îradeyê heme cinîyan a. Ma do bibê vengê Leylaye. Ma veng danê heme şarê xo ke a roje bêrê Meydanê Îstasyon."