Sozdar Oremar

 

ŞEHBA - 20ê Çele seba şarê Efrînî tarîxêke bi gonî yo. Hemsereka Kantonê Efrînî Şîraz Hemo derheqê babete de ajansê ma rê qalî kerde û planê lêşin vate.

 

Şîraze dîyar kerde ke proseso ke Rojhelato Mîyanên bîyo merkezê krîzî, merkezê şerî zî bîyo Sûrîye û her dewlete goreyê berjewendîyê xo nêzdî bîyê û her ca de krîz ameyo kûrkerdiş. Şîraze wina va: "Efrîn bi qurbanê sîyasetê çinkerdiş û qirkerdiş î."

 

Şîraze dewamê qiseykerdişê xo de wina va: "Welatê ke tewr zêde waşt bibo wayîrê vatişî bêşik  yew Rûsya bi. Rûsya û Amerîka mîyanê xo de kewtî hewldayîşê parekerdişê herre. Hetê rojhelat û rojawanê Firatî kerdî babeta bazarî. Her ke şer girs bi, hêzê ke qaşo seba çareserî ameybî zî şer tewr zêde kûr kerdî. Rejîmê her tim waşt cografya û bîyayîşê xo bipawo. Waşt îqtîdarê xo bipawo. Seba Guta çareserî geyrayî û bedelê çareserî çibi, bêşik Efrîn bi. Waştî çeteyê ke Gutayî biancê hetêke û seba nê zî Efrîn weçînayî. Xora dewleta Tirkan qetî destkewtişê şarê Kurd qebûl nêkerd."

 

'Netîceyê tifaqe de Efrîn ame dagirkerdene'

 

Şîraze bale ante serê tifaqê ameyê kerdene de û va netîceyê tifaqan de Efrîn ameyo dagirkerdiş û ame plankerdiş ke Îdlîb de şer bêro vindernayîş û heme çeteyî Efrîn de bêrê bicakerdiş û no plan zî yew bi yew bi ca ame. Şîraze eynî wextî de arde ziwan ke dewleta Tirke zî key krîzê mîyanê xo bi cuya hêrişê destkewtişê Kurdan kena û ma nimûneyê Efrîn de zî nê eşkera dî.

 

Bêvengîya mîyanneteweyî her çî ramojna

 

Şîraze wina dewam kerde: "Bêvengîya mîyanneteweyî hemkarîya planê zelal ramojneno. Efrîn verê çimê heme kesî de ame dagirkerdiş. Bêvengî ramojna ke no plan mabêne dewletan de ameyo kerdene. Kesî nêva Efrîn de merdimî estê. La wexto ke dore ame Îdlîb her kes kewt tevger vatî şer sûcê merdimayî yo la ma pers kenê Efrîn de çîyê ke yenê cuyayîş merdim nêbî. Bi yewbîyayîşê heme dewletan dir Efrîn ame dagirkerdiş."