Keyeyê hepsîyê ke grevê vêşanîye de yî: Ganî ma vengê înan bidî eşnawitiş 

2019-01-13 13:46:58


	 

	WAN - Keyeyê hepsîyan dîyar kerdî ke ê heta peynî piştî danî grevê vêşanîye yê Leyla Guven û heme hepsîyanê bînan û wina vatî: “Çîyo ke keweno milê ma ser oyo ke ma vengê înan bidî eşnawitiş. Heta ke tecrîd peynî bibo ma hetê hepsîyan de yî.”

	 

	Parlamentera Partîya Demokratîke ya Şaran (HDP) ya Colemêrgî û Hevsereka Kongreya Komela Demokratîke (KCD) Leyla Guvene Zindanê Tîpa Eyî yê Amedî de seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene dest bi grevê vêşanîye kerdbî û grev roja 67. de dewam keno. Badê çalakîya Leylaye 16ê kanûna 2018î de zindanan de zî grev dest pêkerd. Waştişê hepsîyan zî sey Leylaye wedarnayîşê tecrîdo girankerde yo. Keyeyê hepsîyan piştî dayî çalakîya hepsîyan û veng dayî heme kesan ke vengê înan bieşnawî. Keyeyê hepsîyê taxa Xaçorta ya Wanî dîyar kerdî ke tecrîd suc merdimîyeyo.

	 

	'Çalakîya Leyla Guvene seba ma hemeyan a'

	 

	Keyeyan ra Halîme Orhane dîyar kerde ke rewşa weşîya Leyla Leylaye ameya dereceyêka krîtîke û wina va: “Her çiqas ke grev meclîs de bêro aşkerakerdiş zî hema çareserî pê nêameyo. Welat de timî pêrodayîş esto. Bi serrran o ma tecrîd cuyenî. No zilm do kamî wext biqedîyo. Ganî dewlete çareser, pê bîyara. Eke wina dewam bikero do zaf xirab bibo. Leyla Guvene seba ma bedenê xo daye merg ver.”

	 

	'Keyeyêk ra 5 hepsî grev de yî'

	 

	Tewr peynî keyeyê hepsîyan ra Havva Kurte qisey kerde û aye zî wina va: “Keyeyê ma ra 5 hepsîyî grev de yî. Qet şik çin o ke do grevê înan netîce bigîro. Beno ke xeylê bedêlî bêrî dayîş, la heta tecrîd nêro wedarnayîş ma do piştî bidî hepsîyan. Wa her kes vengê hepsîyan bido eşnawitiş.”