'Cinî do sey Sakîneyan xo ver bidê' 

2019-01-09 14:16:30


	 

	DÊRSIM - Hemsereka HDPî ya Dêrsimî Ozlem Toprake dîyar kerde ke xoverdayîşê sîyasetmedara Kurdan Sakîne Cansiza ke Parîs de amî qetilkerdiş, ramojnaya ke cinî çiqas xurt ê û wina va: "Sakîneye xoverdayîşê xo sey mîras verda. Cinî do vera hêrişê hemverê cinî sey Sakîne xo ver bidê. Sakîne vernîya ma de bî roşn."

	 

	9ê Çeleyî 2013an de Parîs de hîrê sîyasetmedarê cinî yê Kurdan Fîdan Dogan, Leyla Şaylemez û Sakîne Cansize ameyî qetilkerdiş. Têkoşînê înan cinîyan rê mîras mend. Sakîne Cansiz 1958 de Dêrsim de amî dinya. Sakîne dimayê derbeyê 12ê Adara 1971 ra dima eleqe têkoşînê ciwanê şorişgêran rê ramojna. Sakîne dima ra mîyanê kadroyê rayber ê PKKî de ca girewte.

	 

	Sakîne yewin kongreya PKKî ê 27ê Teşrîna Peyêne 1978an de ca girewte. 1979an de Xarpêt de amî tepiştiş û derbeyê 12ê êlule de hepisxaneyê Amedî de bî. Sakîne bi xoverdayîşê xo yê hepisxaneyî bî sembol. Sakîne 1991 de hepisxane ra vejîya, xebata xo bi hawayêke çalak meşna. Sakîne bi taybet girîngî da têkoşîn cinîyan û cinîyê ke fabrîka de yê rêxistin kerde. Cinîyê ke unîversîte de yê bigîre, heta cinîyê ke fabrîkayan de her kesî dir têkilî da ro. Heto bîn ra kitabê xo yê ke 'Cuya mi her wext, pêrodayîş bî' nuşte.

	 

	'Ma rê bî roşnîye'

	 

	Hemsereka HDPi ya Dêrsımi Ozlem Toprake da zanayîş ke têkoşînê Sakîneye seba cinîyan bîyo hêzêke pîl û va her wext seba înan bîya roşnîye û wina va: "Xoverdayîş senîn ganî bêro dayîş ramojna ma. Sakîne û embazê xo bî sîyê esas ê têkoşînê azadîya cinîyan. Vera kulturê feodal têkoşînêke pîl meşna. Her wext vera şaşî de vinderte û têkoşîn meşna. Sakîneye mîras ma rê verda. Do heme cinî sey Sakîne xo ver bidê, weşik bibê. Coka ma înan sey rayber bivînê û têkoşînê xo bidê cuyayîş. Sakîne temsîlkara xoverdayîşî ya. No xoverdayîş, xoverdayîşê cinîyê Kurdan o."