'Ma serra 2018î de seba cinîyan xeylê xebatan kerdî' 

2018-12-30 13:54:10


	 

	Civîn Husên

	QAMIŞLO - Endama Îdarekara Keyeyê Cinîyan ê  Kantonê Qamişloyî Behiya Murade xebatê Keyeyê Cinîyan ê serra 2018an şîrove kerde.

	Derheqê xebatê Keyeyê Cinîyan ê Kantonê  Qamişloyî Endama Îdarekara Keyeyê Cinîyan Behiya Murade şîrove kerde û va: "Serra 2018an de seba averşîyayîşê cinîyan xeylê xebatê girîng kerdê."

	'Mîyanê xebatanê ma de şîrovekerdişê qanûnê cinîyan zî cayê xo girewt'

	 Behiyaye dîyar kerde ke xebatê Keyeyê Cinîyan de serra 2018an de tewr hîra bi û wina va: "Ma sey 11 cinî Keyeyê Cinîyan ê Kantonê Qamişloyî de xebatanê xo danê meşnayîş. Her hewte perwerde û kombîyayîş virazênê ke warê rêxistinbîyayîşî de gamê tewr pîl bêrê eştiş. Mîyanê xebatanê ma de şîrovekerdişê qanûnê cinîyan zî cayê xo girewtî. Bi qanûnê cinîyan ma probleman çareser kenê. Mîyanê xebatanê ma de vera zewacê emrê qij de û zafzewicnayîş de têkoşînê ma dewam keno. Kongereyê Star û Meclîsê Edaletê Cinîyan serdayîşê Keyeyê Cinîyan Kobanî, Dêrezor, Reqay, Tebqayî kerd û kombîyayîş uca de viraşt û perwerde ame dayîş."

	'Ma serra 2018 de seba cinîyan xeylê xebatan kerd' 

	Behiya dewam de bale ante serê iyê de sîstemê newe û wina va: "Ma serra 2018 de seba cinîyan xeylê xebatî kerdî.

	Meclisê Kantonê Hesekî û Meclisê Kantonê Qamişlo ame awankerdiş. Bajarê Hesekî, Serêkanî, Dirbêsiye, Til Temir, Zergan û temamê qeza û dewê girêdayê Kantonê Hesekî yê kombîyayîş û perwerde ameyî kerdene. Eynî wextî de bi seyan semîner ameyî viraştiş. Seba cinîyan xeylê pawitişê heqê cinîyan ameyî kerdene. Heto bîn ra keyeyê cinîyan xeylê dewayan rê eleqedar bî. Nê dewayî zî wina yê: 663 dewayê problemê mabêne cinî û camêrdan de, 151 dewayê problemê keyeyan, 94 zafzewac, 59 zewaco bi emrê qij, 102 şidet, 85 problemê madî, 34 yê mîras, 12 dayîk û pîyê ke wazenê domananê xo bivînê, yê heq waştiş 32."