'Ma bi hêz, vindetişê polîtîk û îradeya şarî ra bawer î' 

2018-12-24 15:47:33


	 

	Dîlan Babat     

	 

	ENQERE - Sereka Pêroyî ya Berpirsîyara Îdareyê Herêmî ya HDPyî Yurdusev Ozsokmenlere dîyar kerde ke her çiqas ke heme polîtîkayanê şaredarîyan bêrî xespkerdiş zî do tepîya bêrî girewtiş û bêrî qezenckerdiş. Yurduseve qiseykerdişê xo de arde ziwan ke ê bi hêz, vindetişê polîtîk û îradeya şarî ra bawer î. 

	 

	Seba weçînayîşê herêmî ke do 31ê adara 2019î de pê bêro, muracatê vernamzedî yê Partîya Demokratîke ya Şaran (HDP) 18ê kanûne de qedîya yî. Wekîla Hemserekî ya Berpirsîyara Îdareyê Herêmî ya HDPyî Yurdusev Ozsokmenlere dîyar kerde ke seba weçînayîşê herêmî muracatê zêde ameyî kerdiş û va: “Hemverê heme zextan de xeylê muracatî ameyî kerdiş. Prosesê peyînan de taybet Amed, Riha, Colemêrg û Wanî de eştî serê komeleyanê ma û embazanê ma tepiştî. Cok ra ma prosesê muracatan derg kerde.”

	 

	'Do vernîya faşîzm bêro girewtiş'

	 

	Yurduseve dewamê qiseykerdişê xo de va: “Muracatan ra tewr zêde yê cinîyan estî. La polîtîkayê hêrişkar yê AKPyî vera zaf tay muracat kêmî bîyî. Na babete rojeva ma de ca girewte. Ma netîceyê munaqeşeyan de resayî nê tespîtan. Ma do bi lîderîya meclîsê cinîyan perwerdeyê têkoşînî bidî dest pêkerdiş. Weçînayîş seba kurdan û cinîyan zaf muhîm o. Heme çî ra ver do vernîya faşîzm bêro girewtiş. Polîtîkayê ma yê ke AKP û MHP vindî bikerî estî. Zerre û teber de polîtîkayê şer danî meşnayîş. Hetêk de qetilbîyayîşê cinîyan zêde bîyo. Merdim yenî tepiştiş û tewqîfkerdiş. Hemverê Rojawan de planê hêrişkar yenî kerdiş. Padayîşê vernîya na rewşe xeylê muhîm o.” 

	 

	'Ma prosesêko zehmetin ra derbaz benî'

	 

	Yurduseve tewr peynî înan arde ziwan ser: “Ma weçînayîş de hedef kenî ke heme şaredarîyanê ke qayûm tayînê înan ameyî kerdiş tepîya bigêrî. Cinî û ciwan do weçînayîş de hemverê AKPyî de vajî nê. No weçînayîşêko tarîxî yo û zaf muhîm o. Sîstemê hemserekî de do bedilnayîş nêbî. Ma prosesêko zehmetin ra derbaz benî.”