Kedkarî xo seba 31 Adare amade kenê 

2018-12-23 09:43:53


	 

	WAN - Hemsereka SESî ê Wanî Fatma Arslane dîyar kerde ke weçînayîşê mintiqa seba kedkarê ke ameyî îxrackerdiş û cinîyan rê xeylê girîng o û arde ziwan ke seba polîtîkayê qayûm veng vejîyê do verê demokrasî de ca bigîrê û xebatê wina bimeşnê.

	 

	Xeylê endamê Sendîkaya Kedkarê Xizmetê Komelî û Weşîye (SES) bi KHKyan wezîfe ra ameyî îxrackerdiş. Weçînayîşê 31 Adara 2019an de kedkaran tercîhê xo kerdê û heto bîn ra polîtîkayan zî do verê çiman de bigîrê.

	 

	Hemsereka SESî ê Wanî Fatma Arslane bale ante serê girîngîyê weçînayîşê mintiqa û cinîyê KESKî şaredarîyêke senîn wazenê qalî kerdî.

	 

	'Xeylê xebatê mintiqa ameyî kerdiş estê'

	 

	Fatmaye da zanayîş ke Tirkîya de vurnayîşê rejîmêke yeno cuyayîş û tewr zêde zî cinîyan ci ra nasibê xo girewtê û va: "Komelêke ke muhafazakar bîyo wazenê cinîyan bierzê planê peyîn. Cinîyê ke vera nê xo ver danê zî rastê tedayan yenê. No het ra no weçînayîş seba cinîyan girîng o."

	 

	'Roja hesabperskerdişî ya'

	 

	Fatma ke 25 serrî hemşîratî kerdêne û amî îxrackerdiş arde ziwan ke nê weçînayîşê mintiqa seba kedkarê ke ameyê îxrackerdiş zaf girîng o û wina va: "Na rewşe sazgehê îstîmlakkerdişî de ame cuyayîş û şaredarîyan de zî bi taybet mintiqaya ma de qirkerdiş ame kerdene. Xeylê kes nê çî ra tesîr bî. Xebatkarê şaredarîyan ameyî tepiştiş. La ma do weçînayîşê mintiqa de serkewte bibê. Verê qayûman sîstemê hemserekî estbi. Mudirê Polîtîkayê Cinîyan û serekîya Daîreyê Cinîyan hêz dayne cinîyan. Ma newe ra sazgehanê xo wazenê. Qayûman destkewtişê cinîyan çin kerdê. Ma sey cinîyê KESKî do têkoşînê xo dewam bikerê. Ma do hewl bidê ke polîtîkayê qayûm serûbin bikerê."