Mîyanê şert û mercê xidar de karê deştişî kena  

2018-12-22 13:15:20


	 

	Hisna Muhemed 

	 

	ŞEHBA - Xoverdayîş û têkoşînê cinîyê Efrînijan Kantonê Şehbayî de mîyanê şert û mercê zehmet de dewam kenê. Cinîya bi nameyê Xedîce Eloşa ke dewa Beradî û Kampa Vegerî de qezaya Şêrewayî de bi ca bîya xoverdayîşê xo û karê xo yê deştişê dewam kena. Xedîceye va: "Pêwa heme zehmetîyan ê girîng o ke merdim fek têkoşînê xo ra vera nêdo. Ez zî nika têkoşînê xo dewam kena."

	 

	Dimayê ke şarê Efrînî û dewê ci bi zor serê herra xo ra ameyî koçkerdiş, Kantonê Şehba û qezayê Şêrewayî mîyanê şert û mercê tewr xidar de têkoşînê xo dewam kenê. Yew înan ra kesa ke fek têkoşînê xo ra vera nêdaya, cinîya bi nameyê Xedîce Eloşa 45 serrî ya. Xedîceya ke Kampa Vegerî de manena û bi 33 serrî yo karê deştişî kena va: "Sebeb se beno wa bibo, ganî merdim her wext xo bawer bo û seba ke serê linganê xo bimanê têkoşînê cu bidê. Ez nika bi karê deştişî têkoşîn dana."

	 

	'Ez 12 serrî ya xo de deştiş musaya'

	 

	Xedîceye dîyar kerde ke Kampa Vegerî de cuyake hempar esta, her kes hetkarîyê yewbînan kenê û wina va: "Ez 12 serrî bîya karê deştişî musaya. Pêwa heme hêrişan û tank û topê Erdoganî mi fek karê xo ra vera nêda. Wexto ke Erdogan keda destê cinîyan hedef girewt û çeteyê ci kewtî Efrînî ez mecbur menda ke makîneya xo pey xo de verdî û bêrî Şehba de bi ca bibî. Makîneya ke pey mi mend hetê çeteyan ra ame talankerdiş."

	 

	'Ez nika bi karê deştişî têkoşînê cu dana'

	 

	Xedîceye wina va: "Wexto ke ez Kampa Vegerî de bi ca bîya, mi xo rê makîneyêke qij peyda kerd. Nika ez bi karê deştişî hetkarîya merdimê kampe kena û hem zî debara xo kena. Pêwa heme zehmetîyan, çi yo girîng o yo ke merdim fek têkoşînê xo ra vera nêdo. Ez zî nika têkoşînê xo dewam kenaç Sebeb çi beno wa bibo, ganî merdim xo ra bawer bo û seba serê linganê xo de bimanê têkoşînê cu bidê. Ez nika bi karê deştişî têkoşînê cu dana."