'Yê ke tayîn kenê zî baş nêweçînenî '

2018-12-21 14:31:56


	 

	Berîtan Canozer

	 

	AMED - Şaredarîya Farqînî ke qayûm ameyo tayînkerdiş, şarî rê xizmet nêkeno û yeno vatiş ke heta nika  3 qayum ameyî vurnayîş.

	 

	Bi îlankerdişê halo îstîsnayî yê dimayê teşebusê derbeyî îhlalkerdişê heqan xeylê zêde bî. No prosesî de bi se hezaran kes karê xo ra bî. 102 şaredarîyê Partîya Herêmê Demokratîkî (DBP) 95 heb qayum ameyî tayînkerdiş. Bi tayinkerdişê qayûm xeylê proje û xebat ameyî betalkerdiş. 2016an heta nika 3 qayûm tayinê şaredarîya Farqînî ameyî kerdene.

	 

	Raîfe Çelîka ke Farqîn de cuyena: "Yê ke tayîn kenê zî baş nêçînenê we. Do senîn ma rê şaredartî bikerê?

	 

	Tirkîya de dimayê teşebusê derbeyî ra OHAL ame îlankerdiş û îhlalkerdişê heqan zî vejîya sewîyeya tewr cor. Çarçeweya OHALî de bi hezaran kes ameyî îxrackerdiş û 102 şaredarîyê DBPî rê, 94 heb qeyûm ameyî tayînkerdiş. 50 hemşaredar zî ameyî tepiştiş. Yew şaredarîyê ke qayûm tayîn kerdê heta nika tu xizmet şarî rê nêkerdê. Rayîrê Farqîn û dewê ci mîyanê çamure de yê û bi aşman o tu xebate nêameya meşnayîş."

	 

	'Gelo Farqîn de şaredarî esta?'

	 

	Raîfe Çelîka ke Farqîn de cuyena dîyar kerde ke aye yewin rey Farqîn wina xirab vînena û wina va: "Qayûm tayînê şaredarî kerdî. Vatî 'dizdî esta, piştî danê teror, şarî nas nêkenê, pere nêasîyeno.' La ma xebatê şaredarî yê verê qayûmî xeylê razî bî."

	 

	'Qayûm nêxebityeno'

	 

	Raîfeye da zanayîş ke verê qayûm şaredarî her lazimîyê şarî bi ca ardêne û wina va: "Bi aşman o rayîrê dewanê ma xerabe yê. Heta ma şinê dewe yenê saetî derbaz benê. Ma tersenê ke qeza bikerê. Tena rayîrê dewe nê, ya qeza zî xerabe yê. Kuçeyî nînê viraştiş. Xebata asfaltî çin ê. Wexto ke şilîye varena her ca pirrî awe beno. Ma nêeşkenê domanan bieşrawê teber. Qayûm çîyêke nêkerdo. Verê camî yê pîl de parq viraştê. Bi aşman o bi parq pesnê xo danê."

	 

	'Wa vernê de şarî rê xizmet bikerê'

	 

	Cinîya bi nameyê Emîne zî da zanayîş ke wexto ke weçînayîş nêzdî benê, yenê rayan wazenê û wina va: "Kêmasîyê DBPî estbî, la qe nêbo Farqîn pak bi. Ma eşkayne şêrê şaredarî. Wina xirab nêbi. 3 reyqayûm vurya. Ez nika nêzana şaredarî de kam esto. Ez tîya cuyena la nêzana. Borîyê ma teqênê ma telefon kenê pere wazenê. La çîyêke wina ça ameyo vînayîş? Qey şar gune nîyo? Do nika senîn bêrê verê berê ma rayan biwazê."