'Hîna ke netîceyê giran nêvejîyayî raşte ganî goş bidîyo waştişanê Leyla Guvene' 

2018-12-20 13:30:13


	 

	Safiye Alagaş

	 

	STENBOL - Sereka TÎHVî Prof Dr. Şebnem Korur Fîncancîye qala rewşa Leyla Guvena ke grevê vêşanîye de ya kerde û va: “Wexto ke merdim vengê xo nêeşko bido eşnawitiş, muracatê raybaza grevê vêşanîye dano. Hîna ke netîceyê giran nêvejîyayo raşte, ganî çîyê lazim yê çalakgeran bêrî bicaardiş.”

	 

	Hemsereka Kongreya Komelê Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî şermizar bikera, 8ê teşrîna peyêne ra nata grevê vêşanîye de ya û grev roja 45. de dewam kena. Heta nika hîna ti cewabêk nêdîyayo waştişê Leylaye û rewşa aye her keş ona giran bena.

	 

	Sereka Weqfa Heqê Merdiman ya Tirkîye (TÎHV) Prof Dr. Şebnem Korur Fîncancîye qala rewşa Leyla Guvena ke grevê vêşanîye de ya kerde û dîyar kerde ke hîna ke netîceyê giran nêvejîyayî raşte, ganî çîyê lazim bêrî kerdiş.

	 

	'Netîceyê giran estî'

	 

	Sereka TÎHVî Prof Dr. Şebnem Korur Fîncancîye grevê vêşanîye yê Leyla Guvene ercnaye û va ‘ma sey xebatkaranê weşî heme hetê grevê vêşanîye ser o vindenî’ û wina domanye: “Rewşa weşîya merdiman bi hawayo cidî tesîr bena. Qey la B1? Çimkî B1 mezgê merdiman û heme sînîrê bedenê merdiman paweno. Vîşêrê înan sewbîna tesîrê ci yê muhîm zî estî. qet nêbo vernîya seqetîya merdiman padano. Eke B1 nêro xebetnayîş û tena awe, sol, şekir û karbonatî bêrî xebetnayîş do rayîrê kêmasîyanê cidî biabo.”

	 

	'Goş bidêne waştişanê înan'

	 

	Şebneme qiseykerdişê xo de bale ante tesîrê ke grevê vêşanîye de beden û weşîya merdiman ser o benî ser û wina dewam kerde “Eke B1 bêro waştiş û nêro dayîş no binpaykerdişê heqan o. Ganî heme lazimîyê kesê ke grevê wêşanîye de yî, bêrî caardiş. Grevê vêşanîye de badê 40 rojan rewşa weşîya merdiman giran bena. Ma ewnîyenê emrê çalakgeran û rewşa weşîya înan. Ma gore her yew cîya cîya muhîm o. Ganî teqez gam bi game bêrî taqîpkerdiş. Ganî rayapêroyî waştişanê çalakgeran pare bikero û heme kes goş bido waştişanê înan.”

	 

	'Ganî bêrî aşkerakerdiş'

	 

	Şebneme qiseykerdişê xo de yê peyênan de wina va: “Wexto ke merdim vengê xo nêeşko bido eşnawitiş, muracatê raybaza grevê vêşanîye dano. Hîna ke netîceyê giran nêvejîyayî raşte, ganî çîyê lazim yê çalakgeran bêrî bicaardiş. Ganî waştişê Leylaye bi hawayo lez bêrî bicaardiş û rayapêroyî de bêrî aşkerakerdiş.”