Cinîyê Sûka Semtê Cuye ra reaksîyon: Şaredarî nêxebityena 

2018-12-19 14:44:29


	 

	Beritan Canozer

	 

	AMED - Cinîyê ke Sûka Semtê Cuye de xebityenê reaksîyon ramojnayî awa ke cayê sûke de zêde beno dayî û vatî: "Her rey ma şinê şaredarî la çareyêke na awe rê nêvînenê. Şaredarî nêxebityena."

	 

	Sûka Semtê Cuye 2013an de Amed de amebî awenkerdiş. Her hewte cayêke de na sûke yena awankerdiş. Cinîyê ke hewte ra reyke semtê Bagcilar sûka xo  awan kenê, anê ziwan ke ê her di serrê peyîn şaredarî dir probleman cuyenê. Anê ziwan ke seba şilî awe cayê sûke pirr bena û wina zehmetî cuyenê.

	 

	'Ma mîyanê na awe de senîn bixebityê?'

	 

	Bazirganê Sûka Semtê Cuye Esra Ayaze arde ziwan ke bi di serrî yo ê nê problemî cuyenê û wina va: "Hewteyo vîyarte de zî wexto ke ma ameyî seba sûka xo awan bikerê her ca awe bî. Ma zanayîş da şaredarî la nê problemî çareser nêkerdî. Ma zî kuçe de sûke awan kerd. Zabita zî ame û ma bi ceza tehdît kerdî û va uca awankerdişê sûke qedexe yo. Ma qey ma merdim nîyê, 'ma senîn mîyanê awe de bixebityê?"

	 

	'Seba awe ma nêeşkenê bixebityê'

	 

	Sereka Komeleyê Sûka Semtê Cuye Xezal Tunçe zî wina va: "Verê tîya heme herre bî, ma va û serê waştişê ma asfalt kerdî, la cayê herre nêviraştê û awe tîya bena gol. Tena ma nê, muşteriyê ke yenê zî mexdûr benê. Seba awe ma zî serê kerrayan de rayra şinê. Coka ma nêeşkenê bixebityê. Ganî nê rê çareserî bêro vînayîş."

	 

	'Xeylê rey ma geyrayî la kes nêame'

	 

	Gurbet Gulere dîyar kerde ke aye seba na rewşe acis a û wina va: "Beledîye goş nêdana ma. Ma hewl danê ke bi keda destê xo debara xo bikerê. La bi 2 serrî yo, ma nê problemî cuyenê. Xeylê rey ma geyrayî la kes nêame. Ma bi xo na awe pak kenê."

	 

	'Xeylê embazê ma nêweş kewtî'

	 

	Heto bîn ra bazirganan ra Çiçek Aktaye zî wina va: "Bi rojano ke ez nêweş a. Hewteyo bîn zî rewşe wina xirab bî. Ma mîyanê awe de xebityenê. Tena ez nê xeylê embazê ma nêweş kewtî. Bi nanê ma kay kenê. Ma çend rey gerre kerd la çîyêke nêame kerdiş. Vanê 'temam' la nê problemî çareser nêkenê."

	 

	https://www.youtube.com/watch?v=q7ehFyZgpI8&feature=youtu.be