'TOKÎyê modern bi şilî açeryayî gole' 

2018-12-19 12:57:27


	 

	ŞIRNEX - Şarê Sîlopî ke dimayê qedexeyan keyeyê înan ameyî rijnayîş û dima ra TOKÎyan de ameyî bicakerdiş bi di serrî yo mexduriyet cuyenê. Hemwelatîyan dîyar kerdêne ke bi şilîya peyîn de TOKÎ açeryayî gole û fotograf antî û mexdurîyetê xo ardê ziwan.

	 

	Sîlopîyê Şirnexî de 14ê Kanûna 2015an de qedexeyê tebervejîyayîşê kuçeyan ke ame îlankerdiş û aşmêk û nîm dewam kerd. No prosesî de keyeyî ameyî talankerdiş û dimayê qedexe qeza serûbin kerdî. TOKÎ ameyî viraştiş û keyeyî ameyî bicakerdiş. Keyeyê ke deyndarê keyeyê TOKÎ yê, bêsaxlembîyayîşê keyeyan ra bi lome yê. Keyeyan dîyar kerd ke yew çîyêke saxlem çin o. Keyeyan fotografê keyeyê înan ke açeryayê gola awe ajansê ma rê eşrawitî û vatî ganî mexdurîyetê înan bêro çareserkerdiş.

	 

	'Ma ameyê xapênayîş, o zî qîm nêkerd ma kerdî wayîrê deyn'

	 

	Hemwelatîyan da zanayîş ke mitbax ra bigîrê heta tuwalet her cayê keyeyê înan dilop kenê. Hemwelatîyan bi nameyê T. wina va: "Vera keyeyê ma daîreyêke dayî ma. Ma ameyî xapênayîş. O zî qîm nêkerd ma kerdî wayîrê deyn. Seba her metrekareyê awanî 836 TL ame waştiş. Vera nê ne tapo ne zî belgeyêke fermî ame dayîş. Wexto ke keyeyê ma rijnayî, vatî do daîre bidê. La nika keye ça de yo ma ça de yê. Ma 3-4 rey seba nê îmza eşt. Hîrê aşmî ra reyke zî ma ra îmza waştî. Keyeyê ma verê zaf weş bi."

	 

	'Wa warê aîdê ma bidê ma'

	 

	T. tewr peyîn qiseykerdişê xo de arde ziwan ke her kes vera nê caardişan bêveng ê û wina va: "Keyeyê ma rijnayî. Ma mexdur kerdî û xapênayî. Ma keyeyê xo waştî înan ma tokî de bi ca kerd. Ma bendeyê keyeyê xo bî, înan ma deyndar kerdî. Ma wazenê ganî ê herra ma ra vejîyê û keyeyê aîdê ma bidê ma."