Cinîyê ke namzedê keyatî xo ra bawer ê 

2018-12-14 14:01:39


	 

	WAN - Wan de cinîyê ke seba weçînayîşê 31ê Adare muracatê keyatîye kerdê, xo ra bawer ê. Cinîyê ke seba keyatîye mîyanê tevger de yê 'vatişê ma zî esto, hêzo ke ma ramojnenê zî esto û cinîyan piştdayîş waşt.

	 

	Partîyê sîyasî seba weçînayîşê 31ê Adara 2019an seba namzedî bêmabên xebatan meşnenê û Wan de zî seba namzedîya keyatîye cinî kewtî mîyanê tevger. Ayten Işika ke taxa Serhat ê Îpekyolî de bî namzed e wina va: "Taxa ma de her wext camêrdî bîyê keya. Keyatî sey meslekê camêrdan yena vînayîş. Hedefê mi ewil o yo ke ez ramojnî ke cinî benê keya."

	 

	'Ez do ramojnî ke taxe senîn yena îdarekerdiş'

	 

	Aytene dewamê qiseykerdişê xo de da zanayîş ke heme cinîyê taxe dir do biba heval û wina va: "Lazimîyê cinîyan virazyî ez do hewl bidî bibî cewab. Ez do xebatê ekolojîk bimeşnî. Ez do keyeyê şînî viraznî. Keyeyê ma ê şînî çin o. Ma do viraznê. Seba warê îstîhdamî yê cinîya abibo, ez do her çî bikerî. Ez do kuçe bi rengê cinîyan bixemlînî. Ez do ramojnî ke taxe senîn yena îdarekerdiş."

	 

	'Çira cinî nêbê keya?'

	 

	Namzeda taxa Yenîmahale Umran Kurte zî wina va: "Seba vera zîhnîyetê feodal ê camêrdan vatişê cinîyan bibo ez bîya namzed e. Wexto ke problemê cinîyan bibo, nêeşkenê derdê xo keyayê camêrdan ra vajê. Wexto ke merdim ewnîyeno tewr zaf cinî taxe de wext derbaz kenê. O wext çira cinî nêbê keya? Ma zî îdareyê mintiqa de estê. Vatişê ma zî esto û hêzê ma yê ke ma bikerê zî esto."