'Ganî cinî 31ê adare de îqtîdar ceza bikerî û birijnî' 

2018-12-12 15:58:08


	 

	Sîbel Ozalp

	 

	STENBOL- Amadekarîya weçînayîşê herêmî bêmabên dewam kena. Parlamentera HDPyî ya Îzmîrî Serpîl Kemalbaye dîyar kerde ke îqtîdar do 31ê adare de bêro cezakerdiş û herinda xo tepîya bigêrî û va: “Ma wazenê ke 31ê adare biba roja vengê cinîyan yê Kizilcakoyo ke vera cendirmeyan de xo ver dayî.”

	 

	31ê adare de do Tirkîye de weçînayîşê herêmî pê bêro û pêroyê partîyê sîyasî seba weçînayîşê herêmî xebatanê xo yê weçînayîşî dayî destpêkerdene û xebat dewam kenî. Parlamentera Partîya Demokratîke ya Şaran (HDP) ya Îzmîrî Serpîl Kemalbaye derheqê tîfaqê cinîyan kerde û dîyar kerde ke bi taybet hetê cinîyan de weçînayîşê 31ê adare zaf muhîm o.

	 

	'Şar do hêzê xo ramojno'

	 

	Serpîle destpêkê qiseykerdişê xo de va ‘prosesêko faşîzm tede bîyo komel cuwîyeno’ û wina dewam kerde: “24ê Hezîrane de seba ke faşîzm bibo komel xeylê aver şî. Ganî heme cinîyî seba rijnayîşê rejîmê yew kesî têkoşîn bikerî. Weçînayîşê 24ê hezîrane ra nata waştişê aştî, azadî û demokrasî dewam keno. Her çiqas ke hemverê şarî de hêriş bêro kerdiş zî, şar weçînayîşê prosesê kehenan de zî demokrasî de israr kerd. Şar do weçînayîşê 31ê adare de hêzê xo nîşan bido.”

	 

	'Wazenê cinîyan ser de sîstemê yew kesî daîmî bikerê'

	 

	Serpîle qiseykerdişê xo de daye zanayene ke piştî û yewîya cinîyan do proseso zehmetin ke yeno cuyayîş derbaz bikerî û domnaye: “Beno ke rojeva ma ya cîya biba. Labelê rejîmê yew kesî yê camêrd heme cinîyan tehdit keno. No proses de qezencê cinîyan ameyî xespkerdiş. Cinîyan ser de sîstemêko binpaykerdişê kede esto. Hewl danî cinîyan ser de sîstemê yew kesî yê camêrdan daîmî bikerî. Îqtîdar wazeno cinîyan mîyanê sîstemê kapîtalîst de vindî bikero. Keda cinîyan nîna dîyayîş. Îqtîdar wazeno ‘profîê cinîya makul’ awan bikero.”

	 

	Serpîle arde ziwan ke îqtîdar  tewr zêde cinîyan mîyanê keye de heps keno û va: “Cinî cîya yenî vînayîş. Ganî cinîyî weçînayîşê 31ê adare de têkoşînê xo gird bikerî. Ganî ma vindetişo ke cinîyan heme cayan de wayîrê vatişî bikerî bidî nîşandayîş. Seba ke ma weçînayîş de îqtîdarî ceza bikerî û birijnî, ganî ma bixebetî.”