Dimayê 14ê Kanûna 2015an: Ma ê ciwanan xo vîr ra nêkerd 

2018-12-11 13:54:46


	 

	ŞIRNEX - Serê qedexeyê tebervejîyayîşê kuçeyan ê Cizîrî de 3 serrî derbaz bi û tedayê serê şarî dewam kenê. Nursal Dalmişa ke qedexe de seba ke keyeyê xo terk nêkerdebî amî qetilkerdene û dayîke aye Sultan Dalmişe dîyar kerde ke kêna aye û ciwanê bîn seba ke Cizîr terk nêkerdî ameyî kiştiş û wina va: "Nika wazenê ma tîya terk bikerê. La ma ê ciwanî xo vîr ra nêkerdê. Belkî no zulm peynî nêbo la ma do qetî sere nêtewênê."

	 

	Hîrê serrî verê 14ê Kanûna 2015an de Cizîr de qedexeyê tebervejîyayîşê kuçeyan amebi îlankerdiş 3 aşman de xeylê kes ameyî kiştiş bi seyan kesî bodruman de ameyî qetilkerdiş. Înan ra yew zî Nursal Dalmişa 18 serrî bî.

	 

	'Verê keyeyê mi de birîndar bî'

	 

	Sultane dîyar kerde ke kêna aye zaf wayîrê hişmendî bîya û wina va: "Domanîya xo ra girêdayê têkoşînê Kurd bî. Qedexe de keyeyê ma ame gulevarankerdiş. O wext Nursele birîndar bî. No zulmî senîn şarî rê rewa dî? Gulevarankerdiş de keyeyê ma zaf texrîp bi. Dimayê wextê ke ma mecbur mendî keyeyê xo ra vejîyê. Ma şî Sîlopî. La kêna mi va ez uca ra nêşina cayêke. Dima ra ma zanayîş ci ra nêgirewt. Ma televîzyon de zanayîş aye ra girewt. Cenazeyê aye ma berê Sînor ê Xaburî ra girewt. Çi waştî ciwananê ma ra zerrîya ma veşnayî."

	 

	'Ma do sere nêtewênê'

	 

	Sultane tewr peyîn qiseykerdişê xo de da zanayîş ke bi seyan ciwanê bê çek û sivîl verê çimê heme dinya de ameyî qetilkerdiş û wina va: "Ne çek ne zî  bombayê înan bî. Seba ke Kurd bî ameyî qetilkerdiş, veşnayîş. Kêna mi zî sey bi seyan ciwanan xebatkere bî. Kêna mi rayîrê xoverdayîşî de cuya xo vindî kerde. Kêna mi vera zulmî sere nêtewêna. Beno ke no zulm nêqedîyo la ma do qetî sere nêtewênê. Ma do Cizîrî ke ciwanan ma rê mîras verdayo qetî vera nêdê."