Maya ke şînê aye hema nêqedîyaya: Piştî bidêne ma hesab pers bikerê 

2018-12-10 14:26:21


	 

	MÊRDÎN - Wayê û birayê yewbînan Havîn û Fatîh Guneşî Nisêbîn de baxçeyê keyeyê xo de kay kerdêne, netîceyê teqnayîşê madeyêke de cuya xo vindî kerdibî. Dayîka înan Derya Guneşe bi di serrî yo şîn gêna. Deryaye a roja ra nat cilê sîya ro xê pêşnaya û dîyar kerde ke înan derheqê cigêrayîşê heq de kes ra piştdayîş nêgirewtê û waştişê piştdayîş kerde ke berpirsyarî hesab pers bikerê.

	 

	Wextê qedexeyê tebervejîyayîşê kuçeyan ê Nisêbîn de çekê giranê ke ameyne xebitnayîş, nika benê sebebê cuya domanan. 31ê Adara 2017an de Taxa Abdulkadîr Paşa de domanê bi nameyê Havîn (3) û Fatîh (5) serre wexto ke baxçeyê keyeyê xo de kay kerdêne netîceyê teqnayîşê madeyêke de bi giranî birîndar bî. Wirdî domanan nêweşxane de cuya xo vindî kerdî. Maya înan Derya Guneşe a roje ra nat sîya da xo ra û şinêke bêpeynî ante. Seba cigêrayîşê hedîseyê ke di domanê xo vindî kerde, qet aver nêşi.

	 

	Seba hema dosyan eynî sebeb: Dosya zêde yê

	 

	Dimayê hedîse keyeyî muracatê sucî kerd û dima ra cigêrayîş ame destpêkerdiş. Dosya de xêrcê raporê otopsî ca nêdayî tu delîlan. Pêwa serê hedîse ra hende wext derbaz bi zî hema îdianame nêameyo amadekerdiş. Keyeyî dîyar kerde ke dozgerîye bi sebebê ‘dosya zêde yê, ma nêeşkenê biewnê ci ra' her wext taloq kena.

	 

	'Ma parçeyê domanan kom kerd'

	 

	Keyeyî dîyar kerd ke hedîse sey çapemenî de vejîyayo kuçe de nê, baxçeyê keyeyê înan de ameyo cuyayîş û wina va: "Hedîse baxçe de amî cuyayîş. Ma fam nêkerd se bi. Domanan va 'ma şinê baxçe' 3 deqe dima ra veng ame. Ma va belkî veng cayê pêrodayîş ra meyo. La ma wexto ke vejîyayî ke baxçe de teqyayo. Bedenê domanan parçe bibi. Dimayê hedîse ma êdî nêşî a kîşte. Ma bi sîyan uca girewt."

	 

	'Piştdayîş bidê ma hesab pers bikerê'

	 

	Deryaye arde ziwan ke a roje ra nat nêvejîyaya baxçe û heme cilê domananê xo nimtê. Derya rojnameyê ke hedîse ser ameyê nuştiş nimitê. Her roj şina serê gorê domananê xo û cilê sîya dana xo ra û wina vana: "Roja ke domanê mi cuya xo vindî kerdî heta nika ez sîya dana xo ra.  Her paşeme seba mi cîyayo. Eynî saete de eynî veng eşnawena. Ez nêzana çîyê zereyê xo senîn qalî bikerî. La çîyê ke ez cuyaya wa tu dayîk nêcuyê. Wa dişminê mi nêcuyê. Kamî zerrîya mi veşna wa zerrîya înan zî biveşîyo. Her kesî domanê mi xo vîr ra kerdî la ez do heta peyîn heqê înan bigeyrî. Ma heta ewro piştdayîşê kesî nêdî. :Bi di serrî yo kes verê ma de çin o. Wa piştdayîş bidê ma, wa kiştoxê domanê mi cezaya xo biancê."