Grûbanê 2in grevê vêşanîye yê hepisxaneyan dewr girewtî  

2018-12-09 15:54:53


	 

	MERKEZÊ XEBERAN - Grevê vêşanîye yo ke hepsîyê PKK û PAJKîyî seba tecrîdê serê Rayberê Şarê Kurdî Abdullah Ocalanî wedarîyo kewtîbî ci hetê grûba dîyine ra ame dewrgirewtene.

	 

	Merdimanê hepsîyan û avûkatan derheqê tayê zîndananê ke tede grevê vêşanîye yeno dewamkerdene nê hayîdarîyî dayî:

	 

	ÎZMÎR

	 

	* Hepsîyê ke Zîndanê Girewteyî yê Tîpê Fyî yê Kiriklarî yê 1. û 2. de mendêne bi 3 kesan dabi destpêkerdene. Peynîya roja 10. grevê vêşanîye sey grûba dîyine Îshak Dayan, Tekoşer Turgut û A. Kadîr Akdoganî dewr girewt.

	 

	* Zîndanê Girewteyî yê Cinîyan ê Şakranî de 4 koxuşan ra yew kese 4 kesan dest bi grevê vêşanîye kerd.

	 

	* Zîndanê Tîpê Tyî yê Şakranî yê 3. de 18 hepsîyanê sîyasîyan ra 6ê ci kewtî grevê vêşanîye.

	 

	* Zîndanê Tîpê Tyî yê Şakranî yê 2. de hepsîyo bi nameyê Xebat Aydemîrî yo ke wextêkê nizdî de tîya rê amebi sirgûnkerdene zî tede 10 kesan dest bi grevê vêşanîye kerd.

	 

	* Zîndanê Tîpê Tyî yê Şakranî yê 4. de grevê vêşanîye yo ke bi grûbanê 5 kesan amebi destpêkerdene hetê Yusûf Ozdemîr, Erkan Tamîr, Nebî Dagtekîn, Sadir Alabalik û Vahadettîn Budakî ra ame dewrgirewtene.

	 

	* Zîndanê Tîpê Tyî yê Menemenî de zî 3 kesan dest bi grevê vêşanîye kerd.

	 

	* 50 hepsîyanê sîyasîyanê ke Zîndanê Odemîşî de 3 koxuşan de manenê, mîyanê înan de Ahmet Başbogayo ke 26 serrî yo zîndan de maneno zî tede Firat Çelebî, Abdulvehap Aydemîr û Abdurrahman Sîlînsînî dest bi grevê vêşanîye kerd.

	 

	BALIKESÎR

	 

	* Zîndanê Tîpê Tyî yê Bandirma yê 1. de her koxuşe ra 6 kesan dest bi grevê vêşanîye kerd. Naye ser hetê îdareyê zîndanî ra dest dîya serê radyoyanê hepsîyan. Ame vatene ke dimayê grevê vêşanîye ra zextê serê hepsîyanê nê zîndanî hîna bîyî vêşî.

	 

	* Zîndanê Tîpê Tyî yê Burhanîye yê 1. de zî cinîyê hepsî yê sîyasîyî bi hawayêkê biagêrayîşî bi yew kese grevê vêşanîye domnenê.

	 

	MANÎSA

	 

	* Zîndanê Girewteyî yê Tîpê Tyî yê Manîsa de hepsîyanê sîyasîyan ra 4 kesan dest bi grevê vêşanîye kerd.

	 

	* Zîndanê Girewteyî yê Tîpê Myî yê Alaşehîrî ke newe abîyo de Ahmet Aslano ke tepişteyo tek ê nê zîndanî yo dest bi grevê vêşanîye kerd.

	 

	KONYA

	 

	* Zîndanê Girewteyî yê Tîpê Tyî yê Konya de sey grûba ewilêne hepsîyanê bi nameyê Şîyar Firat û Cuma Dayanî dest bi grevê vêşanîye kerd.

	 

	DÎLOK

	 

	* Hepsîyê bi nameyê Nurullah Ugur, Agît Nas, Yakup Brukanli, Muhammed Bazencîr û Velat Tufekî yê ke Zîndanê Girewteyî yê Tîpê Hyî yê Dîlokî de bî sey grûba ewilêne dest bi grevê vêşanîye kerd.

	 

	ŞIRNEX

	 

	* Hepsîya cinî ya sîyasîye ke nameyê ci nêame zanayene û hepsîyê bi nameyê Hakan Kutlu, Kerîm Sevînç, M. Alî Bayar, Halîl Kabak û Ebubekîr Nengî Zîndanê Girewteyî yê Tîpê Tyî yê Şirnexî de sey grûba dîyine dest bi grevê vêşanîye kerd.

	 

	MÊRDÎN

	 

	* 10ê ci camêrd û 2yê ci zî cênî, 12 hepsîyê ke Zîndanê Girewteyî yê Tîpê Eyî yê Mêrdînî de yê sey grûba dîyine grevê vêşanîye dewr girewt.