Domanê Cizîrî: Bêkes û Bişenge  

2018-12-09 14:06:11


	 

	ŞIRNEX - Qedexeyê tebervejîyayîşê kuçeyan ê Cizîrî de ke 14ê Kanûna 2015an de ame îlankerdiş de bi seyan kesî cuya xo vinî kerdî û yew înan ra zî Bîşeng Garana 12 serrî bî. Lajê Orhan Tunçî ke bodruman de amebi qetilkerdiş û o wext amebi dinya, Bêkes kewt 3 serre yê xo.

	 

	Serê qedexeyê tebervejîyayîşê kuçeyan ê Cizîrî Şirnexî ke 14ê Kanûna 2015an de ame îlankerdiş dir 3 serrî derbaz bi. Qedexeyê 79 rojan dewam kerd û şarê Cizîrî bi seyan ewladê xo vindî kerdî. Bêkes, roja ke pîyê ey Orhan Tunç bodrum de ame qetilkerdiş, ame dinya. Bêkes nika 3 serre yo. Bêkes o ke persê çira pîyê ey çin o perseno, dayîka Bîşeng Gara ke 12 serrî bî qedexeyê tebervejîyayîşê kuçeyan de amî qetilkerdiş zî bi fotografê kêna xo rojê xo derbaz kena.

	 

	Nîm saet ambulans pawitî

	 

	Roja 25ê qedexeyî de 6ê Çeleyê 2016an de taxa Cudî de bi guleyê mîyanê qerebalixê ke 60-70 kes bodrum ra bi rengê sipî vejîyayne Bîşeng Garane amî qetilkerdene. Bîşenga ke nîm saet birîndar verike dayîka xo de bendeyê ambulanse mende, nêweşxane de cuya xo vindî kerde. Dimayê hedîse cigêrayîş de tu averşîyayîş nêvirazya û dayîka aye Talîa bi fotografê kêna xo roja xo derbaz kena.

	 

	'Kêna mi 12 serrî mende'

	 

	Talîaye wina va: "Kêna mi waştêne biba doktor. Kêna seba vindîkerdişê gonî merde. Berdî morg. 4 rojan uca de mende. Seba qedexeyî ma nêeşkayne şêrê. Dima ra vatî do goristanê bêkesan de defin bikerê. Ma şî û girewte. Destûr nêdayî ma Cizîr de defin bikerê. Ma zî dewêke nêzdîyê tîya de defin kerde.  Kêna mi zaf xebatkere bî. Vatêne ‘ Ez do biba doktor.’ La nêverdayî. Kêna mi 12 serrî mende. Pîl nêbî."

	 

	'Bêkes her ke pîl beno fam keno'

	 

	Rojê ke qedexe dewam kerdêne de Orhan Tunç vernê de lingê xo ra birîndar bi û mîyanê birîndarê bodrumê taxa Cudî de ame qetilkerdene. Roja ke cuya xo vindî kerd, 24 saetî dima ra lajê ey Bêkes ame dinya. Orhan qiseykerdişê telefonî ê peyîn de cinîya xo ra va wa nameyê lajê ey ‘Bêkes’ bo. Guler Tunçe wina va: "Çend aşmî ra dima lajê mi hîrê serre yê xo qedêneno. Qedexe kewenê serrê çarine. Bêkes çîyêke nêzano. La êdî heme çî fam keno. Orhan her wext lajê xo xeyal kerdêne. Planên ey seba lajê ey estbî. Hesretê lajê xo bi. Bi nê hesretî cuya xo vindî kerd."