Çeteyê OSO kampa Mîdyatî de yenî cakerdiş? 

2018-11-08 15:33:43


	 

	MÊRDÎN - Goreyê îdiayan kampa AFADî ya qezaya Mîdyatî ya Mêrdînî de çeteyê OSOyî yenî cakerdiş. Heto bîn de zî kampa AFADî ya Mîdyatî ke ameyo vengkerdiş de newekerdişê konan bale anceno.

	 

	DAIŞ serra 2014î de Şengal de qetlîyam viraştbî û netîceyê qetlîyamî de nizdîyê 30 hezar kurdê êzidî kewtî rayîran û ameyî koçkerdiş. Êzidîyê ke 4 serrî ver fermanê 74. ra ameyî koçkerdiş, badê ke sînor derbaz kerdî û ameyî bakurê Kurdistan hetê rayîrberîya Tirkîye ra kampanê cîya cîyayan de ameyî cakerdiş.  Êzidîyê ke kampa Wêranşarî ya Riha de ameyî cakerdiş badê demêk kirişîyayî kampa Mîdyatî ya Mêrdînî. Goreyê îdiayanê Ajansê Mezopotamya kampa Wêranşarî vengkerdişê koçberan ra dima bîya wargehê leşkeran.

	 

	Kampa Nisêbînî de çeteyê OSO yenî cakerdiş

	 

	Hûmara êzidîyê ke dinya de nizdîyê 700-800 hezarî ya, badê qetlîyamî kampanê cîya cîyayan de ameyî cakerdiş. Nê kampan ra yew zî kampa Mîdyatî ya Mêrdînî ya. 3 hezar êzidîyê ke kampa Mîdyatî de ameyî cakerdiş ra hezar û 200 kesî kampe de mendî û yê ke bînî zî şîyî Ewropa. 6 aşmî verê cû kampa AFADî ke êzidîtede mendêne teslîmê Komeleya Goç-Derî ameye kerdişe. Badê îdiayê ke kampa Nisêbînî de çeteyê OSO yenî cakerdiş, 2ê teşrîna verêne de Goş-Der kampe teslîmê FADî kerd.

	 

	Badê ke veng kerdî konan newe kenî

	 

	Wexto ke êzidî kampe de mendêne 170 xebatkarî tede xebetîyayêne. Nê xebatkaran ra 30-35 kesî mendî û yê bînî erşawitî bajarê de tede Goç-Der estî rê. Ame îdiakerdiş ke badê ke êzîdî û erebî kampe ra ameyî vengkerdiş konê kampe do bêrî newekerdiş. Goreyê îdiayan mudirê kampa AFADî ya Mîdyatî vato: “Ez nê 30-35 xebatkaran nêdana. Demê verîn de lazimîya mi bi înana esta.’

	 

	Do çeteyê OSO tîya de bêrî cakerdiş

	 

	Goreyê malumatê ke ma xebatkaranê kampe ra girewt, ame îdiakerdiş ke do kampa AFADî ya Mîdyatî de çeteyê OSO bêrî cakerdiş. Xebatkarê ke malumat dayî qiseykerdişê xo de wina vatî: “Ma nêzanayêne ke do kamê kesî kampe de bêrî cakerdiş. Tena ma ra vatî ke do konê kampe bêrî newekerdiş. Sewbîna vatî; eke hedîseyêk pê bêro do kesê mexdurî tîya de bêrî cakerdiş. La goreyê malumatanê ke ma eşnawenî do çeteyê OSO tîya de bêrî cakerdiş. Çîyêk wina bibo daxî ma rê nîno vatiş. Tena ma xebetîyenî.”