Binawanîya ke qayûm viraşt rijîya û keye bin awe de mendî 

2018-11-07 15:09:34


	 

	ŞIRNEX - Xebata binawanî ke qayûm viraştbî rijîya û netîceyê rijyayîşî de borîyê awe teqîyayî. Turîl Îkeya ke keyeyê aye bin awe de mend dîyar kerde ke badê ke keyeyê înan bin awe de mend bi desan reyan muracat kerdî, la şaredarî mexdurîyetê înan çareser nêkerda.

	 

	Badê qedexeyê tebervejîyayîşê kuçeyan yê Şirnexî hema hema pêroyê awanîyan ameyî rijnayîş û herinda înan de TOKÎ ameyî viraştiş. Şirnexo ke sey ‘bajarê modern’ yeno şinasnayîş de tabloya raştî badê varayîşê varanî vejîya raşte û şar rewşe vera aciz o.

	 

	'Mexdurîyetê înan nêameyo çareserkerdiş'

	 

	Badê ke varan vara bajar de Nêweşxaneyê Dewlete zî mîyan de bi desan awanîyî bin awe de mendî. Kuçe û taxan de golê şenik virazîyayî. Varano peyên de borîyê kanalîzasyonî teqîyayî û keyeyê Turîl Îkeye zî mîyanê awe de mend. Herçiqas ke bi desan reyan muracatê şaredarî bikerî zî hema mexdurîyetê înan nêameyo çareserkerdiş.

	 

	'Şaredarî çîyêk nêkena û ewnîyena ma'

	 

	Turile qiseykerdişê xo de daye zanayene ke keyeyê înan ê taxa Gundogduyî varayîşê varano zêde vera bin awe de mend û wina dewam kerde: “Peynîya keyeyê ma de borîyê kanalîzasyonî teqayî. Keyeyê ma bin awe de mend. Yew serrî yo ke rewşa kanalîzasyonan wina ya. Ma 10 reyan dîlekçe nuşt. La çareserî nêdîyî. Heme eşya û çîyê keye têk şîyî. Çîyêk daxî nîno xebetnayîş. Ma hewl danî probleman çareser bikerî. Şaredarî çîyêk nêkena û ewnîyena ma.”