Dest dayî serê pêkayê Sîyabendî  

2018-11-07 09:19:00


	 

	STENBOL- Sîyabendo 3 serre ke bi serrêke yo maya xo dir hepisxaneyê Cinîyan ê Bakirkoyî de maneno, pêkayê seba ey bi lihîfan ameybî viraştiş, hetê îdareyê hepisxaneyî ra ameyî desteserkerdiş. Verê nê zî îdarekarê hepisxaneyî pêkayan seba Mîrazî ameybî eşrawitiş, qedexe kerdî.

	 

	Hatîce Başkalane ke Stenbol de cuyena serrêke verê amî tepiştiş û berdî hepisxaneyê cinîyan ê Bakirkoyî. Seba ke kes çinbi lajê aye Sîyabendî ra biewno, nika bi lajê xo dir hepisxane de manena. Ame dîyarkerdiş ke îdarekarê hepisxaneyî bi serrêke yo pêkayê ke seba Sîyabendî yenê eşrawitiş nêdano.

	 

	Merdimê Hatîceye diyar kerde ke 2-3 parçe setê LEGO dayê Sîyabend la ê zî seba ke goreyê emrê ey nîyê hepsîyê koxuşe lihîfan û cil û belgê kanan ra pêkay viraştê.

	 

	‘Tehemulê înan pêkayan rê zî çin o'

	 

	La wextê peyînan de pêkayê Sîyabendî ameyî desteserkerdiş. Hatîceye ke çîyê cuyaya merdimanê xo ra neql kerde û wina va: "Ma mudirî ra va. Mudirî zî va 'Ma ê lihîfan bi zîmet danê şima. Ma seba rakewtişê şima danê. Şima nêeşkenê bikerê pêkayan'. Ma zî va şima bi nê caardişan domanî ceza kenê. Tehemulê pêkayan zî nêkenê."

	 

	Serra vîyarte zî pêkayê seba Mîrazî hetê hepisxaneyê Cinîyan ê Bakirkoyî ra ameyî astengkerdiş.