Hezar û 500 TL cezaya werdo ke nîno dayîş birnayî! 

2018-11-05 15:29:42


	 

	Zeynep Durgut

	 

	COLEMÊRG - Serra 1934î de ‘Qanûnê Heqê Werd û Xercê Mehkuman’ ame vetiş. Rayîrberîya zindanê Gîresunî hepsoyo bi anmeyê Îbrahîm Kanî rê cezaya pere ‘heqê werdî’ birna. Keyeyê Îbrahîmî reaksîyon nîşan da qerarî ro û dîyar kerd ke ê do pere nêdî.

	 

	Serra 1934î de ‘Qanûnê Heqê Werd û Xercê Mehkuman’ ame vetiş. Na çarçewe de hepsîyan ra ‘heqê îaşeyî’ yanî sewbîna bi nameyê ci ‘heqê werdî’ yeno waştiş. Çarçeweya na qanûnî de hepsîyo bi nameyê Îbrahîm Kanî ke Zindanê Tîpa Eyî yê Gîresunî de maneno ra hezar û 500 TL ‘heqê werdî’ waştî û ceza ci rê birnayî. Keyeyê Îbrahîmî reaksîyon nîşan da qerarî ro û dîyar kerd ke ê do pere nêdî û hukmat wazeno keyeyê kurdan bêçare vera bido.

	 

	'Ma na ceza qebûl nêkenî û pere nêdanî'

	 

	Cinîya Îbrahîmî Guzel Kane wina va: “Îdarekarê zindanî bi zîhnîyetê Esat Oktay Yildirimî têgêrenî. Mêrdeyê mi 3 serrî yo ke zindan de yo. Surgunê Zindanê Gîresunî kerdî. Seba ke rewşa ma ya ekonomîye baş nîya ma nêeşkenî şêrî pêvînayîşe. Tewqîfkerdişê mêrdeyê mi ra nata ez nêeşkaya şêra pêvînayîşê ci. La nika ma qetî nêeşkenî şêrî Gîresun. Kênaya mi astengdar a. Seba ke rewşa ma baş nîya avûkatê Îbrahîmî zî çin î. Serranê 90an de çi kerdişî estbî, nika dewam kenî. Bi hawayo kêfî tepişenî û ceza danî. Îbrahîmî rê hezar û 500 TL cezya werdî birnayî. Zindan ra ma gêrayî û vatî ‘ganî şima heqê werdî bidî.’ Zindan werdê hepsîyan ra berpirsîyar o. Na cezaya bi kamî aqile ameya birnayîş? Ma na ceza qebûl nêkenî û pere nêdanî. Kênaya mi nêweş a û pere çin o ke ez kênaya xo biba nêweşxane. Ez senî dewlete dewlemend bikera.?”

	 

	'Wazenê bi madî û manewî keyeyê kurdan bêçare vera bidî'

	 

	Guzele tewr peynî va: “Dewlete wazenê bi madî û manewî keyeyê kurdan bêçare vera bida. No qanûn serranê 90an de estbî. Dewlete hem tewqîf kena  hem zî pere wazena. Gelo no heq o? Wazenê bi madî û manewî keyeyê kurdan bêçare vera bidî. Zindana de werd zî nêdanî hepsîyan. Pereyê kamî werdî wazenî? Mêrdeyê mi bê suc ame tewqîfkerdiş. Eke ma ceza nêdî do zindan derheqê ma de doza îcra akero. Ma no zilm û zordarîyean qebûl nêkenî.”