Bedîa Ozgokçe: Hepisxaneyan de sucê merdimayî yeno kerdene 

2018-10-31 13:23:48


	 

	WAN - Bedia Ozgokçeya HDPyije dîyar kerde ke îhlalkerdişê heqê merdiman ê hepisxaneyan û tehdîdê mergî polîtîkayê dewlete ra cîya nîyê û va: "Eke komel wayîrê hepsîyan nêvejîyo do Tirkîya tewr xirab biba hepisxaneyêke girewte."

	 

	Parlamentera Partîya Demokratîke ya Şaran (HDP) ê Wanî Bedia Ozgokçe îhlalkerdişê heqê merdiman ê hepisxaneyan şîrove kerde û va ke AKPyî masaya çareserî qelibnaya û nika babeta şerî de israr kena.

	 

	Bediaye arde ziwan ke tepiştiş, operasyonê tepiştişî, caardişê fîşkerdişî konseptêke îşkenceyî yo û wina va: "Ma polîtîkayê ke şarî çin keno dir rî bi rî yê. No polîtîkayo tewr giran zî hepisxaneyan de vejîyeno meydan. Burhaniye, Xarpêt, Patnos û Wan de xeylê îhlalkerdişê heqê merdiman sewîyaya îşkenceyî vejîyeno verê çiman. Cigêrayîşo viran, komkerdişê weşanan, êdî bîyê karê rojane. Heme çî hewl danê ke bi sebebê 'asayîşî' normal bikerê."

	 

	'Hêriş dewlete ra cîya nîyê'

	 

	Bediaye da zanayîş ke Figen Şahina ke Hepisxaneyê Girewte yê Tîpê T yê Burhaniye de hepsîya bi merdişî ameya tehdîtkerdiş û wina va: "Hepisxaneyê Girewte yê Tîpê T yê Wanî 4 hepsî kewtî grevê vêşanî. Xeylê reyan eştê serê koxuşê cinîyan, ameyê derbkerdiş. Nê hêrişî dewlete ra cîya nîyê."

	 

	'Dewlete sucê merdimayî kena'

	 

	Bediaye da zanayîş ke înan zafê reyan muracatê sucî kerdê la no bi netîce nêbîyo û wina va: "Dewlete nê bi hawayêke sîstematîk û eşkera kena. Dewlete sucê merdimayî kena. Ganî vera nê caardişanê vera merdimayî têkoşînêke bêro kerdene. Eke komel wayîrê hepsîyan nêvejîyo do Tîrkîya tewr zêde biba hepisxaneyêke girewte."