'Erdogan vano krîz çin o, la ma nêeşkenê komir bigîrê' 

2018-10-30 12:55:51


	 

	WAN - Cinîyan reaksîyon mojnayî vayîya komiro ke seba krîzî zêde bîya û wina vatî: "Erdogan vano krîz çin o. La ma kûr ra hîs kenê. Ma seba zimistanî nêeşkenê komir bigîrê. Ma do zimistanî heme bicemidyê. Do Wan de heme domanî nêweş bikoyê."

	 

	Seba krîzê ekonomî heme çî ame vaykerdiş û bi ameyîşê zimistanî dir vayîye arûdû zî zaf zêde bi. Komiro ke serê dolarî yeno, seba TL erjê xo vindî kerdo, komir zî bi vay û şar girewtişê komirî de zehmetî anceno. Wan de komiro ke ganî aşma 9in de bêro girewtene, hema kes nêeşkeno bigîro. Serra vîyar te de vayîya tonêke komirî hezar û 200 bi, emsar 500-600 TL zêde bîyo. Ciwalê komiro ke 25 kîlo yo zî 45 lîra yeno rotiş. Tonê kolîyan zî 900-100 TL yo.

	 

	'Vayîya komirî tewr zêde bi'

	 

	Cinîya bi nameyê Evîn Yacana ke taxa Hacibekîrê Îpekyolê Wanî de cuyena, keyeyê soba de cuyena û vatişê Tayyîp Erdoganî ê ‘krîzê ekonomî çin yo' arde vîr û va verpay ci şar zaf zêde krîz hîs keno. Evîne da zanayîş ke hema komir nêgirewtê û va vayîya ci zêde yo.

	 

	'Îqtîdarî krîz awan kerd'

	 

	Evîne reaksîyonê xo wina arde ziwan: "Mêrdeyê mi karker o. Butçeya ma çin a. Aşme de 850 lîra kono destê ma. Keyeyê ma kîra yo. Ma 400 lîra danê kîra. Di domanê mi şinê wendegeh. Heme çî bîyo vay. Verê tupe 70 lîra bî û nika û 110 lîra ya. Bazar de kîloyêke firingî 6-7 lîra ya. Serra vîyarte tonêke komir 100 TL bi û emsar bîyo 1800-1900. Kes nêeşkeno bigîro. Xeylê keyeyê Sûrîye ra ameyê çadiran de cuyenê. Ê do senîn komir bigîrê. Ma do heme emsar bicemidyê. Do heme domanî nêweş bikoyê."

	 

	'Ma teşrîna verêne ra soba da ro'

	 

	Cinîya bi nameyê Leyla Aslane zî da zanayîş ke seba domanê aye qij estê, tonêke komir seba aye qîm nêkeno û wina va: "Ma mecbur manenê 2 ton bigîrê. Ma nîmeyê teşrîna verêna ra dest bi tafistişê soba kerde. Wan de zimistan derg o. Seba domanan ma siba û şan de fînenê ta. La seba vayîye ma hema komir nêgirewto. Ma fikrîyenê ke senîn komir bigîrê. Seba dolar heme çî bîyo vay. Ma krîz ra zaf tesîr benê. No zimistan do zaf zehmet derbaz bibo. Ma seba vayîye nêeşkenê çîyêk bigîrê."